Túrikmenstan prezıdenti qazaq tilindegi kitaptaryn tanystyrdy
Túrikmen basshysynyń osy eńbekteri qazaq tilinde alǵash ret jaryq kórip otyr. Shara barysynda Berdimuxamedov birneshe kitapqa óz qoltańbasy men jyly lebizin jazyp, QR Prezıdenti Nursultan Nazarbaevqa berip jiberdi, dep xabarlaıdy QazAqparat tilshisi.
Túrikmen xalqy jylqy janýaryn, ásirese, aqalteke tulparyn erekshe qadir tutady. Memlekettiń eltańbasynda aqaltekeniń beınelenýi sonyń bir aıǵaǵy bolsa kerek. Gýrbangýly Berdimuxamedov ta osy jylqynyń qyr-syryn jaqsy biledi. Sonyń bárin ol "Aqalteke tulpary - maqtanyshymyz ben abyroıymyz" atty eńbeginde keńinen baıandaǵan. "Kók tulparlarynyń samǵaýy" atty fotoalbom-kitabynda túrkimen elindegi jylqy sharýashylyǵy, osy saladaǵy ulttyq dástúrler, sondaı-aq Túrikmenstannyń memlekettik saıasatynyń basym baǵyttary jaıynda aıtyldy. Al "Tulpardyń shapshań shabysy" eńbeginde Gýrbangýly Berdimuxamedov túrkimen tulparyn ulttyq qundylyqtardyń biri retinde kórsetip, sony ǵylymı, tarıxı jáne ádebı-bıografııalyq turǵyda dáleldep shyqty.
"Búgin men Ulttyq mýzeıdi aralaǵanda qazaq pen túrikmen xalyqtarynyń tarıxı, mádenı jaǵynan jaqyn ekenine taǵy bir márte kóz jetkizdim. Ulttyq jádigerler, áıelderdiń áshekeıleri jáne taǵy basqa ortaq qundylyqtarymyz barshylyq. Jylqy janýaryna jaqyndyǵymyz da uqsas. Máselen, bizde "tańerteń turǵanda aldymen ákeńmen, sosyn atyńmen amandas" degen qaǵıda bar. Al tarıxqa úńiletin bolsaq, qazaqtar men túrkimender kóptegen soǵystarda júırik attarynyń arqasynda jeńimpaz bolyp shyqqan. Jaýgershilik zamanda attarymyzdyń júıriktigin basqa ulttar men ulystar da jaqsy bilgen. Sondyqtan bizdiń tarıxymyzda jylqy janýarynyń orny bólek", - dedi Berdimuxamedov Astanadaǵy Ulttyq mýzeıde ótken kitaptardyń tanystyrylymynda.
Túrkimen basshysynyń aıtýynsha, búginde aqalteke tulpary boıynsha xalyqaralyq qaýymdastyq bar. Oǵan Qazaqstan azamattary da kiredi. Al 30 sáýir Túrikmenstanda aqalteke tulparyna arnalǵan memlekettik meıram retinde atalyp ótedi. Gýrbangýly Berdimuxamedov barsha qazaqstandyqtardy osy merekege qatysýǵa shaqyrdy.
Aıta keter jáıt, Túrikmenstan prezıdetiniń kitaptary QR Ulttyq Olımpıada komıtetiniń basshysy Tımýr Qulybaevtyń bastamasymen qazaq tiline aýdarylyp otyr. Buǵan deıin atalǵan kitaptar orys tilinde jaryq kórgen. Qazaq tilindegi nusqalarynyń árqasysy myń danamen basyldy. Olardyń barlyǵy elimizdegi kitapxanalar men oqý oryndaryna taratylatyn bolady.
