Túrikmenstan prezıdenti bılikti jastarǵa berý týraly aıtty

AShHABAD. Týrkmenıstan segodnıa - QazAqparat - Túrikmenstanda Halyq Máslıhatynyń otyrysy ótip, onda Túrikmenstan kóshbasshysy Gýrbangýly Berdymuhamedov sóz sóıledi, dep habarlaıdy QazAqparat Túrikmenstannyń memlekettik agenttigine silteme jasap.

«Sizder bilesizder, 15 jyl buryn, 2007 jyly 17 aqpanda elimizde Túrikmenstan Prezıdentin saılaý ótti. Ol kezde halqym meni joǵary memlekettik laýazymǵa laıyqty kórip, úlken senim artty», - dedi Túrikmenstan kóshbasshysy.

Ol óz sózinde, bul zor senimdi 2012 jáne 2017 jyldary ótken búkilhalyqtyq saılaýda jaqsy sezingenin jetkizdi.
«Endi mine 15 jyl boıy Túrikmenstan Prezıdenti laýazymynda qyzmet etip kelemin. Onymen birge Túrikmenstan mınıstrler kabınetiniń tóraǵasy, Memlekettik qaýipsizdik keńesiniń tóraǵasy, Túrikmenstan Qarýly kúshteriniń Joǵarǵy bas qolbasshysy qyzmetterin qosa atqarýdamyn», - dedi memleket basshysy.
Túrikmenstan basshysy eki jyl buryn paıǵambar jasyna jetkenine, búgin ózi týraly ońaı bolmaǵan sheshimdi talqylaǵysy keletinine toqtaldy.
«Men elimizdiń qazirgi damý kezeńinde memleketti basqarýdy rýhanı ortada jáne jańa zaman talaptaryna saı tárbıelengen jas basshylarǵa berý kerek degen oıdy qoldaımyn. Halyq Máslıhatynyń Tóraǵasy retinde ózimniń mol ómirlik jáne saıası tájirıbemdi osy salaǵa baǵyttaýǵa nıettimin», - dedi Prezıdent Gýrbangýly Berdymuhamedov.