Túrikmenstan BUU-nyń úsh qurylymyna múshe boldy

NUR-SULTAN. QazAqparat-«Túrikmenstan búgin» - Túrikmenstan BUU-nyń úsh birdeı qurylymyna múshe bolyp qabyldandy, dep habarlaıdy QazAqparat «Túrikmenstan búgin» aqparat agenttigine silteme jasap.

Atap aıtqanda, Túrikmenstan 2020-2022 jyldar aralyǵyna Dúnıejúzilik azyq-túlik baǵdarlamasynyń Atqarýshy keńesine, 2020-2024 jyldar aralyǵyna BUU-nyń Halyqty qonystandyrý jáne damý jónindegi komıssııasyna jáne 2020-2023 jyldar aralyǵyna BUU-nyń Esirtki quraldary jónindegi komıssııasyna múshe boldy.

Bul týraly memleket basshysy Gýrbangýly Berdimuhamedovke 10 mamyr kúni Úkimettiń vıdeokonferentsııa túrinde ótken otyrysynda SІM basshysy, vıtse-premer Rashıd Meredov málim etti.

Premer-mınıstrdiń orynbasary túrikmen kóshbasshysyn syrtqy saıasattaǵy atalmysh jetistikpen quttyqtaı otyryp, bul fakti álemdik qoǵamdastyqtyń qazirgi zamanǵy ózekti máselelerdi sheshýde, Turaqty damý maqsattaryna qol jetkizýge baǵyttalǵan Prezıdent Gýrbangýly Berdimuhamedovtyń syndarly strategııasy men jasampaz bastamalaryn qoldaıtyndyǵynyń aıqyn dáleli ekenin atap ótti.

Birikken Ulttar Uıymymen strategııalyq seriktestikti damytý arqyly Túrikmenstan qazirgi ýaqyttyń ózekti máselelerin sheshýge baǵyttalǵan halyqaralyq kúsh-jigerge belsene qatysady. Túrikmenstanda tirkelgen BUU-nyń 7 mamandandyrylǵan agentitkteriniń ókildigi osy dástúrli yntymaqtastyqty nyǵaıtýǵa yqpal etedi. Ortalyq Azııaǵa arnalǵan aldyn alý dıplomatııasy jónindegi BUU Aımaqtyq ortalyǵy Ashhabatta ornalasqanyn atap ótken jón. Sondaı-aq, Nıý-Iork, Vena jáne Jenevadaǵy Birikken Ulttar Uıymdary shtab-páterleri janynda Túrikmenstannyń ókildikteri turaqty túrde jumys istep tur.