Túrikmenbashynyń anasy qurmetine taǵaıyndalǵan orden alynyp tastaldy
ASTANA. QazAqparat - Túrikmenstan Prezıdenti Gýrbanquly Berdimuhamedov áıelderge arnalǵan jańa «Zenan kalby» (Áıel jany) ordenin belgileý týraly zańǵa qol qoıdy, dep habarlady Lenta.rý.
Reseılik «Jańalyqtar» agenttiginiń habarlaýynsha, jańa orden eldiń tuńǵysh prezıdenti Saparmurat Nııazovtyń anasynyń qurmetine 1996 jyly belgilengen osyndaı «Gurbansoltan eje» ordeniniń (Gýrbansoltan - Nııazovtyń anasynyń esimi) ornyn basady.
Jańa marapat respýblıka áıelderine eldiń táýelsizdigin, egemendigin nyǵaıtýǵa qosqan erekshe úlesi, sondaı-aq ekonomıkany, ǵylymdy jáne mádenıetti damytý isine sińirgen eńbegi úshin beriledi. Basqa elderdiń ókilderine óz elderi men Túrikmenstannnyń ekijaqty qatynastaryn damytqany úshin taǵaıyndalady.
Ordenmen birge ortasha eńbekaqynyń (Túrikmenstanda ortasha eńbekaqy 300 dollarǵa jýyq - «Lenta.rý) on eselengen mólsherinde syılyq beriledi. Sondaı-aq marapatqa ıe bolǵandarǵa ortasha eńbekaqynyń 30 paıyzy mólsherinde ústemeaqy belgilengen.
Nııazovtyń bıligi tusynda Túrikmenstandaǵy keıbir eldi mekender, aýdandar, qalalardyń kósheleri jáne basqa da nysandar onyń anasynyń esimimen ataldy. Ol qaıtys bolǵannan jáne 2007 jyly bılikke Berdimuhamedov kelgennen keıin elde jańa prezıdenttiń jeke basyna tabyný dástúrleri qalyptasa bastady. Atap aıtqanda, mektep baǵdarlamasynan Nııazovtyń «Rýhnama» traktaty alynyp tastaldy, onyń ornyna Berdimuhamedovtiń kitaptary engizildi. Sonymen birge elde Nııazovtyń qurmetine atalǵan eldi mekenderdi ózgertý naýqany óristedi.
