Túrikmen sportshylary medaldar sanyn 200-den asyrdy
ASTANA. QazAqparat - Túrikmenstan astanasy Ashhabad qalasynda jaýyngerlik óner túrleri boıynsha jabyq ǵımaratta ótip jatqan V Azııa oıyndarynda jergilikti sportshylar medaldar sanyn 200-den asyrdy, dep habarlaıdy QazAqparat tilshisi. Dál qazirgi kórsetkish boıynsha Túrikmenstan sportshylary 206 medalmen kósh bastap keledi. Onyń 79-y altyn, 58-i kúmis, 69-y qola medal.
Al osy jarystyń toǵyzynshy kúni ekinshi orynǵa Qytaı sportshylary jaıǵasty. Olardyń enshisinde 23 altyn, 21 kúmis, 17 qola, jalpy 61 medalǵa qol jetkizdi. Úshinshi orynda 22 altyn, 18 kúmis, 49 jalpy 89 medal ıelengen Iran quramasy keledi. Tórttikti Qazaqstannan 1 altyn medal artyq alǵan Ózbekstan sportshylary ýysynda ustap tur. Olar 21 altyn, 28 kúmis, 57 qola jalpy 106 medal jeńip aldy. Al otandastarymyz ázirge 20 altyn, 18 kúmis, 27 qola jalpy 65 medalmen besinshi orynda kele jatyr.
Aıta keteıik, atalmysh baıraqty dodaǵa el namysyn qorǵaýǵa Qazaqstannyń 150 sportshysy attandy. Olar jarystyń 17 túrinen synǵa túsýde.
