Túrik telearnasy «Tomırıs» fılminiń jelisi boıynsha serıal túsiredi
«Qazaqfılm» kınostýdııasynyń málimetishe, jobany Túrkııanyń jetekshi telearnasy TRT teleradıokorporatsııasy júzege asyrmaq.
Bul týraly QR Mádenıet jáne sport mınıstri Aqtoty Raıymqulovanyń jaqynda Ystanbulda ótken Korkut Ata Turkic World Film Festival túrik arnasynyń ókilderimen kezdesýinen keıin belgili boldy. Atalǵan basqosýǵa «Qazaqfılm» kınostýdııasynyń basshylyǵy – prezıdenti Aqan Sataev pen vıtse-prezıdent Aıdar Batalov ta qatysty.
Aıta keteıik, «Qorqyt ata» festıvaliniń shymyldyǵyn ashqan «Tomırıs» fılmi túrik jurtshylyǵyna jaqsy tanys. Qyrkúıek aıynda massagetter hanshaıymy týraly kınotýyndy Túrkııada 200-den astam kınoteatrynda kórsetilip, kórermenniń úlken qyzyǵýshylyǵyn týdyrdy.
Sonymen qatar, festıval barysynda túrki álemi elderiniń kınematografııa salasyndaǵy yntymaqtastyǵyn damytýǵa tyń serpin beretin mańyzdy qujatqa qol qoıyldy. Kelisimge QR mádenıet jáne sport mınıstri Aqtoty Raıymqulova, Ázerbaıjan Respýblıkasynyń mádenıet mınıstri Anar Kerımov, Qyrǵyz Respýblıkasy Mádenıet, aqparat, sport jáne jastar saıasaty mınıstri Azamat Jamanqulov, «Ózbekkıno» ulttyq agenttiginiń bas dırektory Fırdavs Abdýhalıkov jáne Túrkııanyń mádenıet jáne týrızm mınıstri Mehmet Ersoı qol qoıdy. Qujat aıasynda taraptar túrki áleminiń kınoındýstrııasyn qoldaýǵa baǵyttalǵan birlesken qor qurýǵa kelisti.
Sondaı-aq, festıval aıasynda Aqtoty Raıymqulova «Qazaqfılm» kınostýdııasynyń basshylyǵymen birge belgili túrik kınematografısterimen jáne festıval qatysýshylarymen birqatar kezdesý ótkizip, birlesken kınojobalardy júzege asyrý máselelerin talqylady.
Esterińizge sala keteıik, bıyl Túrkııanyń mádenıet jáne týrızm mınıstrligi alǵash ret uıymdastyrǵan Korkut Ata Turkic World Film Festival kınofestıvaline 13 elden 42 kınokartına qatysty. Baıqaý baǵdarlamasynda «Qazaqfılmniń» týyndylary, onyń ishinde rejısser Rústem Ábdirashovtiń «Qazaq handyǵy. Altyn taq» tarıhı fılmi, rejısser Baqyt Qaıyrbekovtiń «Ogon, mertsaıýşıı v sosýde» derekti fılmi, rejısser Adaı Ábeldınovtiń «Kúltegin» tolyqmetrajdy anımatsııalyq fılmi, rejısser Satybaldy Narymbetovtiń «Amanat» kınotýyndysy jáne t.b. kórsetildi.
Festıvaldiń saltanatty jabylý rásimi kezinde «Qazaqfılm» kınostýdııasy Túrki álemi kınematografııasyna qosqan úlesi úshin arnaıy syılyqpen marapattaldy. Kınostýdııa prezıdenti Aqan Sataevqa Respect Award atty júldeni belgili túrik aktrısasy Fahrıe Evdjen tabystady.
Kelesi jyly atalǵan festıval Túrkııanyń Býrsa qalasynda ótedi. Al 2024 jyly ony Qazaqstanda ótkizý josparlanyp otyr. Aqtoty Raıymqulova festıval túrki tildes elderdiń rýhanı astanasy – Túrkistanda ótkizilýi múmkin ekenin atap ótti.
