Túrik saıasatkeri «Islamı NATO» qurýdy usyndy
ASTANA. 3 qyrkúıek. QazAqparat - «Saǵadat» dep atalatyn túrik partııasynyń jetekshisi Mustafa Kamalak Soltústik Alıansty eske túsiretin musylmandardyń áskerı-saıası odaǵyn qurýdy usyndy. Onyń pikirinshe, bul odaq Taıaý Shyǵystaǵy kúrdeli jaǵdaıdy retke keltirý úshin asa qajet. Bul jaıynda Hurriyet aqparat kózine silteme jasap muslim.kz habarlady.
Ol: «Áskerı-saıası odaq qajet. Taıaý Shyǵystaǵy berekesizdikti tyıý úshin «ıslamı NATO» qurý kerek», - dep málimdeme jasady.
Sondaı-aq, ol musylman elderiniń biryńǵaı valıýtasyn qoldanysqa engizýdiń qajettiligine toqtaldy. Dese de, onyń bul usynysy jańalyq emes. 2000 jyldardyń bas kezinde bul oı Malaızııa premer-mınıstri Muhammed Mahathırdiń aýzymen aıtylǵan edi. Ol musylman elderine ortaq «dınardyń» alaıaqtyq jolmen belgilenetin valıýta naryǵyndaǵy baǵam kórsetkishine emes, altyn standartyna negizdelýi kerektigin alǵa tartqan bolatyn. Aıtqandaıyn, keıbir habarǵa qaraǵanda, birneshe jyldan keıin Parsy shyǵanaǵy elderiniń yntymaqtastyq keńesi ortaq valıýtany qoldanysqa engizýi ábden múmkin.
Aıta keteıik, «Saǵadat» partııasynyń irgetasyn Túrkııanyń burynǵy premer-mınıstri Nejemetdın Erbaqan qalaǵan bolatyn.
