Túrik rejısseri Selım Gıýneshtiń "Qardaı áppaq" fılmi «Sháken juldyzdary-2011» kınofestıvalynyń bas júldesin jeńip aldy
ALMATY. 16 mamyr. QazAqparat /Ádilet Musahaev/ - Almatyda «Sháken juldyzdary-2011» IX halyqaralyq kınofestıvaliniń jeńimpazdary anyqtaldy.
Ádilqazylardyń sheshimimen túrik rejısseri Selım Gıýneshtiń «Qardaı áppaq» fılmi Bas júldege laıyq dep tanyldy.
Sonymen qatar Iran, Izraıl, Polsha, Germanııa, Reseı jáne Qyrǵyzstannyń avtorlary túrli atalymdar boıynsha jeńimpaz atandy. Al qazaqstandyq Maqsat Ospanov pen Medet Іlgedaevtyń "Ment" týyndysy "Nur Otan" HDP men "Qazaqfılm" AQ-nyń arnaıy syılyqtarymen marapattaldy.
"Nur Otan" HDP ókilderiniń aıtýynsha, bul fılm qazirgi zamanǵy qazaq aýyly ómiriniń jaǵymdy qundylyqtaryn kórsetedi. Sondaı-aq shaǵyn kınokompanııa buryn kózge túspegen jas akterlerdi jınaı otyryp, janrsyz qalypta kórermenge óz týyndylaryn usynǵan.
Esterińizge sala ketsek, baıqaýǵa 55 fılm iriktelip alynyp, «Debıýttar», «Jastar kınosy», «Stýdenttik kıno» jáne «Anımatsııa» sektsııalary boıynsha ótken edi. Oǵan Avstrııa, Germanııa, Grekııa, Anglııa, Italııa, Ispanııa, Indııa, Reseı, Japonııa jáne taǵy basqa elderdiń kınomatagrafısteri qatysqan bolatyn. Baıqaýdyń ár atalym jeńimpazyna «Sháken juldyzdary» kınofestıvalynyń sımvoly retinde músinshe tabystaldy. «Sháken juldyzdary» kınofestıvalyndaǵy Bas júlde esh atalymǵa qaramastan, eń úzdik shyǵarmaǵa beriledi.
