Túrik oqyrmandarynyń qazaq ádebıetine degen qyzyǵýshylyǵy zor - Djemıle Kynadjy

ASTANA. QazAqparat - Túrki akademııasy halyqaralyq uıymynda (TWESCO) Túrkııanyń Gazı ýnıversıtetiniń oqytýshysy, ádebıetshi-ǵalym Djemıle Kynadjy men Qazaqstan Respýblıkasynyń Túrkııa Respýblıkasyndaǵy Elshiliginiń hatshysy, jazýshy Málik Otarbaevpen kezdesý boldy, dep habarlaıdy akademııanyń saıty .

Akademııa qyzmetkerlerimen ótken basqosýda ádebıetshiler qazaq-túrik ádebı baılanysy, aýdarma máselesi tóńireginde jan-jaqty áńgimeledi.

Biraz jyldar boıy qazaq ádebıetin zerttep júrgen Dj.Kynadjy hanym J.Aımaýytov, S.Muqanov, M.Áýezov, Á.Kekilbaev, M.Maǵaýın sekildi kórnekti jazýshylardyń 16 romanyn zerttep, túrik tilinde monografııalyq eńbek jarııalaǵan eken. S.Seıfýllınniń «Kókshetaý» poemasy men Ǵ.Músirepovtiń «Ulpan» romanyn túrik tiline aýdaryp, kitap etip basyp shyǵarǵan ǵalymnyń aıtýynsha, túrik oqyrmandarynyń qazaq ádebıetine degen qyzyǵýshylyǵy eren. Ásirese, kúresker qazaq áıeliniń obrazy somdalǵan «Ulpan» túrkııalyq oqyrman tarapynan zor yqylasqa ıe bolǵan shyǵarma deıdi.

Al, Qazaqstan Táýelsizdiginiń 25 jyldyǵyna oraı 25 qazaq qalamgeriniń shyǵarmalaryn túrik tiline aýdaryp basqan jazýshy M.Otarbaev aýdarma máselesiniń qyr-syry jóninde óz oılary men tájirıbesimen bólisti. Qazaq-túrik ádebıetiniń uqsastyǵy men aıyrmashylyqtary, zerttelýi jóninde de paıymdy pikirlerin ortaǵa saldy. Jazýshy-aýdarmashy M.Otarbaev búginde tanymal túrik aqyny Júnis Ámireniń shyǵarmalaryn qazaqshaǵa aýdarýda eken. Taıaýda qazaq oqyrmandaryna kitap kúıinde usynamyz dedi.

Aıta keterligi, bul kezdesý EKSPO-2017 kórmesine oraı ıÝNESKO jáne ISESKO qamqorlyǵymen Astanada ótip jatqan «Oqý álemindegi oqyrman ult» halyqaralyq kitaphana sımpozıýmy aıasynda uıymdastyryldy.