Túrik kompanııasy Baıanaýylda týrızmdi damytýǵa qyzyǵýshylyq tanytýda
ASTANA. QazAqparat - Pavlodar oblysy ákimdiginde ótken keńeıtilgen apparattyq jıynda Baıanaýyl aýdanynda týrızm salasyn damytýǵa qatysty josparlar talqylandy, dep habarlaıdy pavlodarnews.kz.
- Byltyr Astanada ótken halyqaralyq forýmda «AHISKALI EMLAK» túrik kompanııasymen baılanys ornatyldy, - deıdi óńirlik kásipkerlik, saýda jáne týrızm basqarmasynyń basshysy Dastan Ryspekov. - Kompanııanyń ókilderi Baıanaýyl shıpajaı aımaǵyna kelip ketip, Sabyndykól kóliniń jaǵasyn damytýǵa ınvestıtsııa salýǵa nıet bildirdi. Qazirgi tańda mekeme basshysy Shevket Rashıdti kútip otyrmyz jáne memorandýmǵa qol qoıylady.
Budan basqa, basqarma basshysy týrıster úshin arqan saıabaǵy, arqanmen túsýge bolatyn «Zıp-laın» attraktsıon aımaqtaryn ashý kózdelip otyrǵanyna toqtalyp ótti.
- Bul jobalardy júzege asyrý úshin kásipkerlerdiń arasynda «BJK-2020» baǵdarlamasy aıasynda ótinishterdi qabyldaýǵa qatysty túsindirý jumystary júrgizilýde, - deıdi Dastan Ryspekov. - Zamanaýı úlgidegi «Zolotye peskı» demalys úıiniń qurylysy 90 paıyzǵa aıaqtaldy. Qazirgi tańda ishki jumystar qaldy. 128 oryndyq nysannyń boı kóterýine byltyr 300 mıllıon teńge salynsa, bıyl 40 mıllıon ınvestıtsııa quıý kózdelip otyr. Qysqy ýaqytta Baıanaýyl shıpajaı aımaǵynda týrısterdi bes demalys úıi qabyldaı alady.
Oblys ákimi Bolat Baqaýov basqarma basshysyna sý tartý máselesi sheshilgenge deıin qandaı demalys úıleri týrısterdi qabyldaı alatyndyǵyna saraptama jasaýdy tapsyrdy.
- Bir ǵana «Fakel» men eki shıpajaı jumys istep tur, - deıdi oblys ákimi. - Aqparattyq týrlar jáne ekskýrsııamen shektelip qalmaý kerek. Baıanaýyl kópshilikke tanylǵan brend. Birinshi kezekte turǵan avtojol máselesi sheshimin tapty. Qaraǵandy jáne Pavlodar oblystaryn alǵanda eki mıllıonnan astam adam bar. Bul tolyq kólemde jumys isteý úshin jetkilikti. Jasybaıdan basqa, Toraıǵyr, Birjankól jáne Sabyndykól aýmaǵyn damytýǵa nazar aýdarý kerek.
