Túrik kompanııasy Almaty oblysynda jeńil relsti transport salýǵa nıetti
QONAEV. QazAqparat – Almaty oblysynyń ákimi Marat Sultanǵazıev óńirde jeńil relsti transport (LRT) salýǵa nıetti «Tashıapy» túrik kompanııasymen memorandýmǵa qol qoıdy, dep habarlaıdy QazAqparat tilshisi.
Oblys ákimdiginde buǵan deıin eki kezdesý ótip, joba talqylanǵan bolatyn. Búgin de LRT salýdyń Almaty qalasy men oblys turǵyndary úshin qolaıly ári tıimdi tustary sóz etildi. «Tashıapy» kompanııasy Qaskeleń – Esik – Talǵar – Almaty – Uzynaǵash baǵyttary boıynsha jeńil relsti tarnsport júıesin damytýdy josparlap otyr.
«Halyq tyǵyz qonystanǵan Talǵar jáne Qaskeleń qalalarynda LRT janynda arnaıy turaq bolady. Turǵyndar kólikterin sol turaqqa qoıyp, ary qaraı LRT-men Almatyǵa qatynaıdy. Bul óz kezeginde qala men onyń mańyndaǵy aýdandarda keptelisti azaıtady. Oblystyń 300 myń adamy kúnine Almatyǵa kirip-shyǵatynyn eskersek, qalaǵa júkteme azaıatyny sózsiz», – delingen ákimdik habarlamasynda.
Ázirge jobanyń jalpy quny qansha bolatyny, tartylatyn ınvestıtsııa kólemi belgisiz. Kompanııa tehnıkalyq-ekonomıkalyq negizdemeni daıyndaýǵa 3 shildeden keıin kirisedi.
Seriktestik mamandarynyń esepteýinshe, aıyna 3,5-4 mlrd kiris kiredi dep josparlanyp otyr. Bılet quny shamamen 500 teńge bolady. Adamdar jumysqa baryp-qaıtqan ýaqytta JRT 50-100 myń turǵyndy tasymaldaıdy.
LRT uzyndyǵy 80 shaqyrym bolmaq. Almaty men Qonaev arasyndaǵy joldy qosqanda 150 shaqyrym bolady. Al qurylystyń 1 kezeńi Talǵar-Almaty arasynda LRT salýdan bastalady. Qonaev-Almaty jobasy 2-kezekte qaralady.
