Túrik kásipkerleri Qazaqstannyń aýyl sharýashylyǵy óndirisine ınvestıtsııa salmaq

ASTANA. QazAqparat - Antalıada «Bolashaqqa arnalǵan tuqym» halyqaralyq bıznes-forýmy ótti. Sharany Túrkııa Respýblıkasynyń Tuqym ósirýshiler qaýymdastyǵy uıymdastyrdy, dep habarlaıdy QazAqparat QR Aýyl sharýashylyǵy mınıstrliginiń baspasóz qyzmetine silteme jasap.

Atalǵan is-sharaǵa QR Aýyl sharýashylyǵy vıtse-mınıstri Ábilhaıyr Tamabek bastaǵan qazaqstandyq delegatsııa qatysyp qaıtty.

Vıtse-mınıstr forýmda Qazaqstanda tuqym sharýashylyǵyn damytý boıynsha júrgizilip jatqan jumystar týraly aıtyp berdi.

Atap aıtqanda, ol túrik áriptesterine Qazaqstanda bastapqy tuqym sharýashylyǵyn birlesip damytý qajettiligi týraly aıta otyryp, elimizdiń agroónerkásip keshenine ınvestıtsııa salýǵa shaqyrdy.

Forýmǵa qatysýshylar QR Úkimeti tarapynan belsendi júrgizilip otyrǵan memlekettik qoldaý sharalaryna qyzyǵýshylyq tanytty.

Paneldik pikirtalas qorytyndysy boıynsha, Qazaqstanda túrik kásipkerleri úshin birlesken jumystyń perspektıvaly baǵyttary retinde kókónis óndirý, baý-baqsha ósirý, aýyl sharýashylyǵy tehnıkalary men jabdyqtaryn óndirý, jemister men kókónisterdi óńdeý, qant, kondıterlik ónimder óndirý, sondaı-aq qant qyzylshasyn, jemister men kókónisterdi tereń óńdeý ónimderin óndirý bolyp kórinetini aıtyldy.

Sondaı-aq forým qorytyndysy boıynsha aýyl sharýashylyǵy daqyldarynyń tuqym óndirýshilerimen birge birneshe kezdesýler ótti. Sonyń nátıjesinde maqta sharýashylyǵy, maıly daqyldar óndirisi salasynda birlesken ǵylymı zertteýler júrgizý, sondaı-aq jas ǵalym selektsıonerlerdiń taǵylymdamalary týraly ýaǵdalastyqqa qol jetkizildi.

Foto: gov.kz