Túrik kásipkerleri Qazaqstanǵa 1 mlrd dollar ınvestıtsııa quıýdy josparlaýda
QR SІM-nen málim etkendeı, «Koc Holding», «Yildirim Holding», «TAV Holding», «Calik Holding», «Kibar Holding», «Atabay» jáne «Goknur Gida» atty 7 jetekshi túrik holdıngteriniń basshylarymen ótken kelissózderde azyq-túlik ónerkásibi, mashına jasaý, taý-ken metallýrgııa salasy, ınfraqurylym jáne aqparattyq-kommýnıkatsııalyq tehnologııalar, hımııa ónerkásibi jáne farmatsevtıka salalaryndaǵy ınvestıtsııalyq yntymaqtastyq máseleleri talqylandy.
SІM basshysy Qazaqstan Túrkııamen saýda-ekonomıkalyq jáne ınvestıtsııalyq baılanystardy damytýǵa zor mán beretinin málimdedi. «Biz túrik ınvestorlaryna jan-jaqty qoldaý kórsetýge daıynbyz. Árbir joba memleketimizdiń damýy men Qazaqstan-Túrkııa strategııalyq seriktestigin odan ári keńeıtý úshin erekshe mańyzǵa ıe», - dedi M.Tileýberdi.
Óz kezeginde Túrkııanyń jetekshi holdıngteriniń basshylary Qazaqstan olar úshin ınvestıtsııalyq tartymdy memleket ekenin atap ótip, elimizde óz jobalaryn iske asyrý úshin naqty usynystar aıtty. Atap aıtqanda, bul usynystar ınvestıtsııalyq preferentsııalar túrlerin ulǵaıtýdy, ınfraqurylymdyq máselelerdi sheshýdi, ındýstrııalyq jáne arnaıy ekonomıkalyq aımaqtardyń jumysyn odan ári jetildirýdi, kadrlar daıarlaýdy jáne basqa da mańyzdy baǵyttardy qamtydy.
Atalǵan holdıngterdiń orta merzimdi perspektıvada Qazaqstanǵa salýǵa josparlanǵan ınvestıtsııalarynyń kólemi 1 mlrd AQSh dollarynan asady.
«Sonymen qatar, M.Tileýberdi bıyl Qazaqstanda 10 jańa óndiristi iske qosýdy josparlaǵan túrik kompanııalarymen jumys tańǵy asyn ótkizdi. Túrik kásipkerleri mashına jasaý, medıtsınalyq buıymdar, tamaq ónerkásibi, ınfraqurylym, taý-ken ónerkásibi jáne turǵyn úı-kommýnaldyq sharýashylyq salasyndaǵy jobalardy júzege asyrýdy josparlap otyr.
Túrik kompanııalaryna Qazaqstannyń ınvestıtsııalyq múmkindikteri, bıznes júrgizýdi odan ári jaqsartý boıynsha memleket qabyldap jatqan sharalar týraly tolyq aqparat, sondaı-aq eksporttyq qoldaý, jekeshelendirý jáne memlekettik-jekeshelik áriptestik sheńberindegi neǵurlym perspektıvaly salalar týraly aqparat usynyldy. Bıznesmender Qazaqstan Úkimetiniń ınvestorlardy qoldaý aıasyndaǵy qyzmetin joǵary baǵalap, kórsetken qolǵabysy úshin alǵystaryn bildirdi», - dedi QR SІM-nen.
Sondaı-aq, M.Tileýberdi Túrki keńesi hatshylyǵynyń jańa keńsesine baryp, osy Uıymnyń Bas hatshysy Baǵdad Ámireevpen ústimizdegi jylǵy 31 naýryzda Túrkistan qalasynda ótetin Túrkitildes memleketter yntymaqtastyǵy keńesiniń beıresmı sammıtine daıyndyq barysyn talqylady.
Sapar sońynda QR SІM basshysy qazaqtyń uly aqyny jáne oıshyly Abaıǵa arnalǵan bıýsttiń saltanatty ashylý rásimine qatysty, sondaı-aq onyń esimi berilgen mektepke bardy. Saltanatqa Ystanbul qalasynyń meri Ekrem Imamoglý, osy mektep ornalasqan jáne qazaq dıasporasy jınaqy mekendeıtin Zeıtinbýrný aýdanynyń meri Omer Arys qatysty.
