Túrik ınvestory Túlkibasta sý elektr stantsııasyn salmaq
ASTANA. QazAqparat - Balamaly energııa kózderi jobasy boıynsha ınnovatsııalyq joba bolyp tabylatyn shaǵyn sý elektr stantsııasyn salý maqsatynda Túrkııa Respýblıkasynan kelgen ınvestorlarmen Túlkibas aýdanynyń ákimi Áýelhan Turǵymbekov kezdesti, dep habarlaıdy ákimdiktiń baspasóz qyzmeti.
Kezdesýde aýdan ákimi Túrkııa Respýblıkasynyń «Indýstrıal» kompanııasynyń qarjylyq dırektory Ilıas Koshaslanǵa aýdandaǵy sý jáne jel arqyly shaǵyn elektr energııasyn óndiretin stantsııaǵa qolaıly Mashat, Arys, Qulan ózenderi jáne sý qoımalary men jeldiń basym baǵyttary jaıynda tanystyrdy. Balamaly energııa kózderiniń jasyl ekonomıka salasyndaǵy negizgi bóligi ekendigin aıta kele, aýdanda jobaǵa qolaıly bolatyn baǵyt boıynsha barlyq qoldaý sharalary jasalatynyn jetkizdi.
Túrkııa Respýblıkasynyń «Indýstrıal» kompanııasy jalpy quny 2,0 mlrd. teńgege jýyq, jalpy qýattylyǵy 4,2 mVt tabıǵı ellektr qýatyn óndiretin sý elektr stantsııasyn Mashat ózeni boıynan salýdy josparlap otyrǵanyn tilge tıek etti.
