Túrik ınvestory «Qyzyljar» ekonomıkalyq aımaǵynyń alǵashqy qatysýshysy atandy
SQO ákimdiginde ınvestorlardy tartýǵa arnalǵan óńirlik keńestiń otyrysy ótti. Kezdesýde sátti ınvestıtsııalyq jobalar týraly aıtylyp, ınvestıtsııalyq klımatty jaqsartý joldary talqylandy.
SQO ákimi baspasóz qyzmetiniń málimetinshe, óńir ekonomıkasyn jańǵyrtý úshin jańadan qurylǵan arnaıy ekonomıkalyq aımaq serpin bermek. «YDA Holding» túrik kompanııasy osy aımaq aıasynda jumys isteıdi. Ol alǵashqylardyń biri bolyp jobaǵa qatysyp, oblysqa ınvestıtsııa quıdy. Sheteldik kompanııa Petropavlda kópsalaly aýrýhananyń qurylysyn bastady.
«Bizdiń maqsat - qazirgi jáne bolashaq ınvestorlarǵa meılinshe qoldaý kórsetip, kómek berý. Qazir ekonomıkalyq aımaqqa kirý týraly nemistiń «Claas» kompanııasymen jáne transformator zaýytyn salý boıynsha «Alageum Electric» kompanııalarymen kelisimge keldik», - dedi Qumar Aqsaqalov.
Ótken aptada Petropavlda turmystyq hımııa óndiretin fabrıka iske qosyldy. Joba «Qarapaıym zattar ekonomıkasy» baǵdarlamasy aıasynda júzege asty. Kırov atyndaǵy zaýytta turmystyq tehnıkaǵa qajetti kóp qabatty plata óndirisi qolǵa alyndy. Onyń Qazaqstan boıynsha teńdesi joq.
Jalpy, 2020 jyly óńirge 307 mlrd teńge ınvestıtsııa tartý josparlanǵan. Negizinen kólik, logıstıka, týrızm salalaryna, balamaly energııa kózderine basymdyq beriledi.
