Túrik ınvestorlary Petropavlda álemdik talaptarǵa saı kópsalaly aýrýhana salady
QR Premer-Mınıstri Asqar Mamın Elbasynyń «Áleýmettik qamqorlyq» sharalaryn iske asyrý jáne Memleket basshysy Qasym-Jomart Toqaevtyń qazaqstandyqtardyń densaýlyǵyn saqtaý máseleleri jónindegi tapsyrmalaryn oryndaý aıasynda memlekettik-jekeshelik áriptestik tetigi boıynsha jańa densaýlyq saqtaý nysandaryn salý týraly kelisimge qol qoıý rásimine qatysty.
SQO ákimi baspasóz qyzmetiniń habarlaýynsha, rásim barysynda óńir basshysy Qumar Aqsaqalov pen «YDA Holding» kompanııasynyń basqarma tóraǵasy Arslan Hýseın Petropavlda kópsalaly aýrýhana salý jónindegi memorandýmǵa qol qoıdy.
Arslan Hýseın atap ótkendeı, Qazaqstandaǵy ınvestıtsııalyq ahýal qolaıly jáne ınvestorlarǵa jobalardy júzege asyrýyna barlyq jaǵdaı jasalǵan.
Atalmysh sharaǵa deıin SQO ákimi Arslan Hýseınmen kezdesý ótkizdi. Bul jaıynda óńir basshysy Feısbýktegi jeke paraqshasynda jazdy.
«Investor óz qarjysyna bıyl zamanaýı kópsalaly aýrýhananyń qurylysyn bastaıdy. Biz osy jobany júzege asyrý úshin bir jyl boıy kelissózder júrgizdik. Bul SQO turǵyndary úshin mańyzdy áleýmettik joba. Aýrýhananyń ashylýy sapaly medıtsınalyq qyzmetterdi kórsetip, úzdik tehnologııalardy engizýge múmkindik bermek. Úzdik dárigerler zamanaýı medıtsınalyq qondyrǵylarda jumys isteıdi. Bizdiń turǵyndar óńirden ketpeı-aq, sapaly em alady. Oǵan qosa, medıtsınalyq ortalyq elimizdiń óńirleri men kórshiles Reseı oblystarynyń turǵyndary úshin tartymdy bolady. Osylaısha, biz medıtsınalyq týrızmdi damytamyz», - dedi Qumar Aqsaqalov.
Túrik ınvestory aýrýhanany salyp qana qoımaı, ony basqarady. Kompanııa álem boıynsha 10 zamanaýı aýrýhana salǵan. «YDA Holding» tájirıbege baı, menedjmenttiń zamanaýı standarttaryn engizedi. Sondaı-aq óńir dárigerlerin oqytyp, tájirıbe almasý úshin sheteldik mamandardy tartpaq.
Kópsalaly aýrýhana «Shyǵys» shaǵyn aýdanynda salynady. Ortalyqqa óńirdiń alty negizgi statsıonarlary: oblystyq aýrýhana, onkologııalyq dıspanser, kardıoortalyq, perınataldyq ortalyq, 1-qalalyq aýrýhananyń ınfektsııa bólimshesi jáne teri-venerologııalyq dıspanser biriktirilmekshi. Keshenniń aýmaǵynda dárigerlerge arnalǵan baspana turǵyzylady.
