Túrik ınvestorlary Aqtóbede kólik-logıstıka ortalyǵyn salady
Aqtóbe oblysynyń ákimi Ońdasyn Orazalın quny 50 mln AQSh dollary turatyn kólik-logıstıka ortalyǵyn salatyn «S Sistem» túrik kompanııasynyń prezıdenti Hýseın Barlındi qabyldady. Kompanııa salatyn ortalyqta áýe haby bolady.
«Tranzıttik hab retinde Aqtóbe oblysynyń keleshegi zor. Biz óz tarapymyzdan jobaǵa tıisti qoldaýdy kórsetemiz»,- dedi oblys ákimi Ońdasyn Orazalın.
Óz kezeginde Hýseın Barlın óńirdiń kólik-logıstıkalyq ınfraqurylymyn ınvestıtsııalaýda qyzyǵýshylyǵy joǵary ekenin atap ótti.
«Logıstıkalyq hab Qazaqstan men kórshiles elder arasyndaǵy taýar men júk aınalymyn arttyrýǵa múmkindik týǵyzady. Aqtóbe óńirin damytýǵa oń áserin tıgizetinine senimdimin»,- dedi Hýseın Barlın.
Kezdesý barysynda taraptar ınvestıtsııalyq jobalardy júzege asyrý boıynsha ózara yntymaqtastyq týraly memorandýmǵa qol qoıdy.
