Túrik fanattary Konferentsııa Lıgasy matchynyń aldynda Qazaqstan qutqarýshylaryna alǵys aıtty

ASTANA. QazAqparat – Konferentsııa lıgasynyń pleı-off kezeńinde shveıtsarııalyq «Bazelge» qarsy óz alańyndaǵy matchta Túrkııanyń «Trabzonspora» fýtbol klýbynyń fanattary Túrkııada bolǵan joıqyn zilzala saldaryn joıyp, adamdardy aman alyp qalýǵa at salysyp jatqan qutqarýshylarǵa alǵys aıtty, dep habarlaıdy QazAqparat Sports.kz portalyna silteme jasap.

Fanattar banner ilip qoıǵan. Onda úıindi astynan adamdardy shyǵarýǵa kómektesip júrgen, qolyna bala ustaǵan qutqarýshy beınelengen. Qutqarýshynyń temir qalpaǵynda túrik halqyna qaıǵyly apattyń saldarymen kúresýge kómektesip jatqan ár eldiń týlary beınelegen. Olardyń qatarynda Qazaqstannyń da týy bar. QR TJM qyzmetkerleri Túrkııanyń eki eldimekeninde izdeý-qutqarý jumystaryn jalǵastyryp jatyr.

Keıingi derek boıynsha, Túrkııadaǵy zilzaladan qaza tapqandar sany 36 myń adamnan asty.

Eske sala keteıik, QR Prezıdenti Qasym-Jomart Toqaev Túrkııaǵa jedel kómek kórsetýge mıllıon dollar bóldi. Sondaı-aq memleket basshysy Úkimetke Túrkııaǵa 55 tonna kóleminde qosymsha gýmanıtarlyq kómek jiberýdi tapsyrdy.

Qazaqstandyqtar da Túrkııanyń zardap shekken turǵyndaryna belsendi túrde gýmanıtarlyq kómek jınap jatyr. Kahramanmarashta Qazaqstan jibergen alǵashqy kıiz úıler quryla bastady.

6 aqpanda Kahramanmarashta magnıtýdasy jeti baldan joǵary eki jer silkinisi tirkeldi. Júzdegen aftershokqa jalǵasqan jerasty dúmpýi eldiń 10 provıntsııasynda, sondaı-aq kórshiles elderde, onyń ishinde Sırııada sezildi.

Prezıdent Rejep Taıyp Erdoǵan elde jeti kúndik jalpyulttyq aza tutý kúnin jarııalady.

Foto: sports.kz