Túrik dárigerleri mıdaǵy isikke pyshaqsyz ota jasady
ASTANA. QazAqparat - Túrik dárigerleri mıdaǵy isikke pyshaqsyz ota jasap, Parkınson aýrýyn emdeý úshin adamdardy óz elderine shaqyryp otyr.
Túrkııanyń birneshe qalasynda ornalasqan emdeý ortalyqtarynyń mamandary kez kelgen dertten aıyqtyrýǵa qaýqarly. «MedıkalPark» klınıkasynda kardıohırýrgııa, onkologııa, transplantatsııalaý, jilik maıyn aýystyrý sekildi qyzmetter jolǵa qoıylǵan.
Astanalyq Erkin Beıbithan - aplastıkalyq anemııanyń aýyr túrine shaldyqqan 3 jasar qyzyna em izdep Túrkııaǵa barǵan otandastarymyzdyń biri. Shamamen bir jyl kezekte turyp, shetelde emdelý úshin memlekettik kvota kútken jas otbasy aqyry Ystambuldaǵy klınıkaǵa jeńildik alǵan.
"Balamdy 5 aı daıyndady. Meniń jilik maıymdy alyp, aýystyrdy. Osydan 3 juma buryn jasady. Endi nátıjesin kútip otyrmyz. Meniń kletkalarymnyń qyzymnyń denesinde ósip-jetilýin kútip otyrmyz»,-deıdi ol.
Erkin syndy talaıǵa úmit otyn uıalatqan - «MedıkalPark» klınıkalar jelisi. 1995 jyly Túrkııada irgesi qalanǵan ortalyqtyń 2 aýrýhana kesheni, 13 klınıkasy men 2 medıtsına ortalyǵy bar.
"Álemge áıgili «MedıkalPark» emhanalar júıesi kezdesetin derttiń 90 paıyzyna jýyǵyn emdep, naýqastyń saýyǵyp ketýine baryn salatyn sanaýly mekemelerdiń biri. Bul klınıkanyń basty ereksheligi mıdaǵy isikke pyshaqsyz ota jasalady. Naýqastar aldymen qaralyp, keıin arnaıy qondyrǵy ornalasqan jerge jiberiledi. «Gamma knife» nemese sáýleli pyshaq dep atalatyn qurylǵy arqyly mıdyń syr bergen qabatyna birden 300 sáýle túsiriledi. Operatsııa tolyǵymen mamandardyń baqylaýynda bolady. Eger barlyǵy oıdaǵydaı ótse naýqas birden úıine jiberilýi múmkin.
Túrik mamandary Parkınson aýrýyn emdeý úshin aǵzaǵa arnaıy batareıa ornatyp, adamnyń qımylyn shıraq etedi, dep habarlaıdy KTK.
