Túrik dárigerleri aqtóbelik balalarǵa tegin ota jasady
AQTÓBE. QazAqparat -Aqtóbege túrik dárigerleri kelip, balalardyń qulaǵyna joǵary tehnologııaly ota jasady, dep habarlaıdy QazAqparat tilshisi.
Aqtóbede alǵash ret qulaǵy estimeı qalǵan balalarǵa sátti ota jasalyp, ımplantatsııa qoıyldy. «Baqytty bala» jobasy aıasynda jasalǵan ota kezinde jergilikti dárigerler de tájirıbe jınady.
«Aqtóbe medıtsınalyq ortalyǵynda óńirde birinshi ret estý qabileti tómendegen balalarǵa ota jasalyp, ımplantatsııa qoıyldy. Úsh ota da Túrkııanyń Gazı ýnıversıtetinen kelgen dáriger Redjeptiń qatysýymen boldy. Joǵary tehnologııaly, qymbat ota elimizdiń Astana men Almaty qalalarynda ǵana jasalyp jatyr. Bizdiń dárigerler tájirıbe jınap, aldaǵy ýaqytta ózderi operatsııa jasamaq. Al túrkııalyq dáriger aqtóbelik balalarǵa tegin kómek kórsetti»,- dep habarlady oblystyq densaýlyq saqtaý basqarmasynyń baspasóz qyzmeti.
Aıta keteıik, Aqtóbe oblysy boıynsha estý qabileti buzylǵan 74 bala bar. Olardyń 10-y ota jasaý kezeginde tur. Túrik dárigerleri 2-5 jas aralyǵyndaǵy úsh balaǵa ota jasady. Balalardyń bári tórtinshi deńgeıli qulaq aýrýy dertine shaldyqqan.
«Túrik dárigerleri balalardyń qulaǵyna ornatqan ımplanttyń turaqty jumys isteýin qamtamasyz etý, jóndeý úshin programmator qural-jabdyǵyn syıǵa tartý etti. Bul jergilikti jerde ımplanttardy baqylap, onyń úzdiksiz jumys isteýin qamtamasyz etýge múmkindik beretin apparat. Ota kezinde jergilikti otorınolarıngologtar men sýrdologtar tájirıbe jınady. Aldaǵy ýaqytta olar balalarǵa kómek kórsete alady»,- dedi baspasóz qyzmeti.
