Túrik azamaty lotereıa oınap, ǵaryshqa joldama utyp aldy
ASTANA. 24 tamyz. QazAqparat - Ǵaryshqa tegin ushýǵa múmkindik alǵan túrik azamaty jerden tysqary keńistikte namaz oqýdy josparlap otyr. 41 jastaǵy ulty túrik Erjan Qaıǵysyz jylý qondyrǵysyn satyp alý kezinde utysy bar oıyn bıletine ıe bolamyn dep múldem oılamaǵan edi.
Alǵashqyda ol oıyn bıletine asa mán bere qoımaǵan bolatyn. Tek ermek úshin oıynǵa qatysyp kórmek bolady. Aıaq astynan baǵy janyp, baqyttan basy aınalǵan ol: «Shattyǵymda shek bolmady, - dedi qýanyshymen bólisken ol. - Úsh uıyqtasam túsime kirmegen jaǵdaı... Qarapaıym aýyl adamymyn. Sóıte tura ǵaryshqa ushamyn... Senýdiń ózi qıyn!».
Ol bul baqytqa «ımanymnyń jáne namazymdy qaza qylmaı oqyǵanymnyń arqasynda jettim», - dep esepteıdi. «Sol sebepti, ǵaryshqa ózimmen birge qasıetti Quranymdy, jaınamazymdy jáne túrikterdiń baıraǵyn ala ketemin. Eger sáti tússe ǵaryshta eki márte namaz oqýǵa bel býyp otyrmyn».
Muslim.kz saıtynyń jazýynsha, ol ǵaryshqa 2013 jyldyń jeltoqsan aıynda ushady.
