Túrik áskeri sırııalyq eki ushaqty atyp túsirip, Aleppodaǵy aerodromdy qıratty
NUR-SULTAN. QazAqparat – Túrik áskeri Sırııanyń Idlıb aýmaǵynda Bashar Asad rejıminiń SU-24 markaly eki ushaǵyn atyp túsirdi. Olar bul kezde túrik ushaqtaryna shabýyl jasap jatqan bolatyn, dep habarlaıdy Anadoly agenttigi Túrkııanyń ulttyq qorǵanys mınıstrligine silteme jasap.
Habarlamaǵa sensek, Asad kúshteriniń áýege qarsy qorǵanysqa arnalǵan úsh qurylǵysy da joıylǵan. Onyń bireýi jaqynda Túrkııa áýe kúshteriniń ushqyshsyz apparatyn atyp túsirgen bolatyn.
Sondaı-aq, senbi kúni Túrkııa áýe kúshteri Aleppo provıntsııasyndaǵy Neırab aýdanynda ornalasqan Bashar Asad rejımine tıesili aerodromdy qıratty . Bul áskerı nysandy Asad kúshteri belsendi túrde paıdalanyp kelgen edi.
Aıta keteıik, Alepponyń shyǵysyndaǵy Kýveıras aerodromyna jasalǵan soqqydan keıin Asad kúshteri óziniń búkil avıatsııalyq tehnıkasyn Neırab aýdanyndaǵy aerodromǵa kóshirgen edi. Degenmen, ony da túrik áskeri jaryp jiberdi.
Jergilikti aqparat kóziniń málimetinshe, Sırııanyń soltústik-batysyndaǵy aerodromdardy jaramsyz etý Asad jaqtastarynyń eldiń osy bóliginde manevr jasaý múmkindigin aıtarlyqtaı shekteıdi.
Túrkııanyń ulttyq qorǵanys mınıstri Hýlýsı Akar buǵan deıin Idlıb aımaǵynda «Kóktemgi qalqan» operatsııasy júrgizilip jatqanyn málimdegen edi. Qorǵanys vedomstvosy basshysynyń sózine sensek, bul operatsııa 27 aqpanda túrkııalyq 36 áskerı qyzmetkerdiń ómirin qıǵan áýe soqqysyna qarsy jaýap retinde júrip jatyr.
Onyń aıtýynsha, Túrkııa Sırııa aýmaǵynda Reseıge qarsy qarýly qaqtyǵysty kózdep otyrǵan joq.
