Túrik ánshisiniń oryndaýyndaǵy «Qamajaı» áni qazaqstandyqtardy tańǵaldyrdy
ASTANA. QazAqparat - Belgili túrik ánshisi Sıýmer Izgıý qazaqtyń halyq áni «Qamajaıdy» erekshe yqylaspen oryndaǵany sonshalyq, onyń ónerine júzdegen otandasymyz tánti boldy, dep habarlaıdy «Ekspress-K» basylymy.
Sıýmer Izgıýdiń sahnadaǵy oryndaýy aldymen YouTube arqyly tanylyp, keıin «Qamajaı» Facebook jelisinde jarııalandy. Aranjırovkada óńdelgen ánniń tamasha shyqqany sonshalyq, kóptegen qazaqstandyqtar ózderiniń halyq ánderin qaıta tanyǵandaı boldy. Sıýmer Izgıý - aty álemge áıgili ánshi. Onyń kontsertteri Germanııa, Italııa, AQSh, Belgııa jáne Shvetsııa elderinde jıi ótip turady. «Óner ıesiniń Qazaqstandaǵy fanattary ártisti elge qonaqqa shaqyrýdy talap etip otyr», - dep atap ótti basylym.
