Túrik ánshisi Tarkan nashaqor ekenin moıyndady
ASTANA. Naýryzdyń 2-si. QazAqparat - Ótken aptada polıtsııa júrgizgen esirtkige qarsy reıd barysynda ustalǵan túriktiń ataqty ánshisi Tarkan, dúısenbi kúni Ystambul prokýratýrasynyń sheshimimen bosatyldy.
Jergilikti telearnanyń habarlaýynsha, ártis ózimen birge ustalǵan taǵy 10 adammen birge keshe kúndiz Besiktas aýdandyq sotyna jaýap alý úshin jetkizildi, dep habarlaıdy ITAR-TASS agenttigi.
Sot amaly 45 mınýttaı ýaqytqa sozyldy. Prokýrordy suraqtaryna jaýap bergen Tarkan: «esirtki zattaryn qabyldaıtynyn» moıyndap, «biraq onysy úshin qatty ókinetinin» aıtty. Dostary men tanystaryna esirtki taratady degen kúdikti ol úzildi-kesildi teriske shyǵardy. Buǵan deıin kýágerlerdiń biri polıtsııaǵa «tanymal ánshiniń óz úıine dostaryn esirtkige shaqyratynyn» málim etken bolady. Kúdik keltirýge de osy málimdeme sebep bolyp otyr.
Keıbir málimetter boıynsha, ánshi medıtsınalyq tekserýden ótip, nashaqorlyqtan emdelýge ázir ekenin aıtyp otyr.
