«Turǵynúıqurylysjınaqbanki» «Nurly jerge» qatysýshylar úshin nesıe sharttaryn jeńildetti
ASTANA. QazAqparat - «Turǵynúıqurylysjınaqbanki» «Nurly jer» baǵdarlamasyna qatysýshylar úshin nesıe sharttaryn jaqsartty. Bul týraly búgin Ortalyq kommýnıkatsııalar qyzmetindegi brıfıngte atalǵan bank basqarmasy tóraǵasynyń orynbasary Janar Jubanııazova málim etti, dep habarlaıdy QazAqparat.
«Eger buryndary salymshy «Turǵynúıqurylysjınaqbanki» arqyly baspana alý úshin salymnyń týra 50 protsentin jınaýy qajet bolsa, endigi ýaqytta «Nurly jer» baǵdarlamasy arqyly baspanaly bolǵysy kelgen salymshylar 30 protsentin jınaıdy. Qalǵan 20 protsent baǵdarlamanyń ósimimen ıntegratsııalanýǵa ketedi. Sonymen qatar baǵdarlama aıasynda aýqymdy jeke turǵyn úı qurylysy josparlanǵan. Biz elimizdiń óńirlerine saparlap qaıttyq. Ásirese Qostanaı oblysynda jeke turǵyn úı qurylysy qarqyndy júrýde. «Nurly jer» baǵdarlamasy boıynsha jeke turǵyn uı salý úshin nesıe alýǵa ótinim bergen alǵashqy salymshylarymyz da bar», - dedi ol.
Jubanııazovanyń aıtýynsha, óńirlerdegi baspananyń eń joǵary quny sharshy metrine 180 myń teńgeden, al Astana men Almaty qalalarynda sharshy metrine 220 myń teńgeden aspaıdy. Jalpy baǵdarlama aıasynda shamamen 13 myń jańa páter salynady dep kútilýde. Bul shamamen 860 myń sharshy metrdi quraıdy.
