«Turǵynúıqurylysjınaqbanki» klıentteri úshin barlyq komıssııany joıdy

ASTANA. QazAqparat - «Turǵynúıqurylysjınaqbanki» klıentteri úshin barlyq komıssııany joıdy. Bul týraly búgin Ortalyq kommýnıkatsııalar qyzmetindegi brıfıngte atalǵan bank basqarmasy tóraǵasynyń orynbasary Janar Jubanııazova málim etti, dep habarlaıdy QazAqparat.

«Turǵynúıqurylysjınaqbanki» men «Qazposhta» yntymaqtastyq týraly kelisimge qol qoıdy. Endigi ýaqytta «Turǵynúıqurylysjınaqbanki»  salymshylary «Qazposhtanyń» kez kelgen bólimshesinen banktiń ónimderi boıynsha keńester alyp, kredıtterin jaýyp, depozıtterin tolyqtyra alady. Buǵan deıin nesıeni japqany nemese depozıtin tolyqtyrǵany úshin 1 protsent mólsherinde komıssııa bekitilgen edi. Búgingi kúni bul shara «Turǵynúıqurylysjınaqbanki» salymshylary úshin tegin», - dedi ol.

Onyń aıtýynsha, bank «Qazposhtanyń» taramdalǵan bólimsheleriniń arqasynda Qazaqstannyń barlyq turǵyndaryna sapaly qyzmet kórsetetin bolady. Bank shamamen 950 myń salymshyǵa qyzmet kórsetedi. Olardyń depozıt qorjyny 460 mlrd. teńgeni quraıdy.

 «Turǵynúıqurylysjınaqbankinen» depozıt ashý úshin salymshy óz shotyna 15 myń teńge salýy tıis. Bul komıssııa emes, aqsha tolyǵymen salymshynyń shotyna túsedi. Qazirgi ýaqytta shamamen 200 myń salymshyǵa ınternet-bankıng jáne mobıldi bankıng qyzmeti arqyly qyzmet kórsetilýde. Onyń 47 myńy memlekettik baǵdarlamaǵa qatysý múmkindigin aldy.

«Turǵynúıqurylysjınaqbankiniń» basqa da seriktesterimen ýaǵdalastyǵy bar. Bank klıentteri «Halyq banki», «Kaspıı banki», «Eýrazııalyq bank», «Qazkommertsbank» fılıaldarynda depozıtterin tolyqtyryp, nesıelerin jaba alady. Bul rette «Turǵynúıqurylysjınaqbanki» klınetteri úshin barlyq komıssııalyq alymdar joıylǵan. Óıtkeni barlyq shyǵysty bank óz moınyna alady», - dedi Jubanııazova.