Turǵyndardyń shaǵymynan soń Aıagózdegi qazandyq jóndelip jatyr
ÓSKEMEN. QazAqparat - Aıagózdegi jylynbaıtyn páterlerge jylý molynan berile bastady, dep habarlaıdy QazAqparat tilshisi.
Buǵan deıin 40 myń halqy bar Aıagóz qalasynda qys ortasynan aýmaı jatyp jylý máselesi týyndaǵanyn jazǵan bolatynbyz.
Indıra Muhamadıeva esimdi muǵalimniń áleýmettik jelige shyǵarǵan beıneúndeýi búkil elge tarap, istiń anyq-qanyǵyn baıyptaý úshin Óskemennnen jaýapty sheneýnikter sýyt attanǵan edi. Shuǵyl jumys tobynyń jetekshisi, oblystyq energetıka jáne kommýnaldyq sharýashylyq basqarmasynyń basshysy Murat Musataevpen telefon arqyly sóıleskenimizde 3-4 kúnniń ishinde sýyq sorǵan úılerge qaıta jan kiretinin aıtyp sendirgen-tuǵyn.
Demalys kúnderi oqıǵa ornyna oblys ákiminiń orynbasary Serik Aqtanov baryp, túıtkilmen tikeleı tanysyp qaıtypty. Oblys ákiminiń baspasóz qyzmeti taratqan málimetke sensek, «Aıagóz jylý» JShS-niń ıeligindegi qazandyq 1975 jyly salynǵan. Sodan beri segiz áleýmettik nysan men 40 kóppáterli úıdi jylytyp keledi. Táýelsizdik jyldary jeke menshikke ótken qazandyq jóndeý jumystaryn kórmegen. Jekeniń menshigindegi nysannyń isine jergilikti ákimdik te kirise almaǵan. Sonyń saldarynan jylý birde mardymdy, birde mardymsyz berilip, qys saıyn qarapaıym halyq qınalatyn. Endi bul másele kún tártibinen birjola alynbaq.
«Qazandyqtyń ıesi jyldar boıy munda aqsha salmaǵan. Sonyń saldarynan qondyrǵylardyń tozyǵy jetip, qys ortasynda syr berdi. Qazandyq durys paıdalanylmaı otyrǵany málim bolǵan soń Óskemen men Semeıden, Glýbokoe aýdanynan kánigi mamandardy ákeldik. Endi 2-3 kúnniń ishinde qajetti deńgeıde jylý beriletin bolady» - dedi Serik Aqtanov.
Qazandyqtyń jylý almastyrǵyshy syr berýi múmkin ekenin aýdan basshylary o basta bilse kerek. Jańa jylǵa deıin ony jańalaýǵa qajet materıaldyń bári satyp alynǵan eken. Semeıden kelgen toptyń jetekshisi Vıtalıı Ivanov qazir bitelgen tútikterdi arshyp, jylý almastyrǵyshty jańalaýǵa kirisip ketkenderin aıtty. Óskemennen kelgen top jóndeý júrgen bólshekterdi jylylap orasa, sýdyń qysymy men mólsherin Almatydan shaqyrylǵan mamandar rettemek.
«Menshik ıesi nysanǵa salǵyrt qarady demesek, qarapaıym jumysshylar óz isin bilip tur eken. Sondyqtan olardy qysqartýdyń qajeti joq dep oılaımyz. Mundaı mańyzdy nysanǵa myqty mamandar qajet» - deıdi Vıtalıı Ivanov.
Jaǵdaıdyń qanshalyqty túzelgenin bilý úshin beıneúndeýdiń avtoryna telefon arqyly habarlasyp kórdik.
«Jylý mol berile bastaǵany ras. Demalys kúni tok peshsiz-aq úıdiń temperatýrasy 15°C boldy. Búgin aıaz kúsheıgendikten qaıta tok pesh qosyp qoıdyq, úıdiń temperatýrasy 18 °C bolyp tur. Dál aıaz túsken shaqta másele rettelgenine táýbe aıtyp otyrmyz. Balam naýqastan aıyǵyp edi, ózim tumaýratyp qaldym. Qazir jylý batareıalary qol tıgizbeıdi. Bizge osyndaı jylý berse jetip tur» - deıdi Indıra Muhamadıeva.
Mundaı jaǵdaı endi qaıtalanbaýy úshin qazandyq jumysyn jergilikti ákimdik óz qolyna alýy múmkin. Qazir «Aıagóz jylý» JShS ıesi men ákimdik arasynda nysandy kommýnaldyq menshikke berý týraly kelissózder júrip jatyr.
