Turǵyndardyń mańyzdy usynys-tilekteri eskeriledi - Erbolat Muqaev
ORAL. QazAqparat - Senat depýtattary Erbolat Muqaev pen Narıman Tóreǵalıev Batys Qazaqstan oblysyna jumys sapary barysynda turǵyndarmen kezdesýde, dep habarlaıdy «QazAqparat» tilshisi.
Shyńǵyrlaý, Bórli, Qaratóbe, Syrym aýdandarynda senatorlar jańadan ashylǵan túrli nysandarda bolyp, aktıv jınalystaryna qatysty. 
Senat depýtattary Parlamentte talqylanyp, qabyldanǵan zańdar, Elbasy Nursultan Nazarbaevtyń tapsyrmalaryna sáıkes elde atqarylyp jatqan jumystar, memlekettik baǵdarlamalardyń oryndalý barysy jóninde áńgimelep berdi. Sonymen qatar turǵyndardyń usynys-tilekterine qulaq túrdi. Mysaly, Qaratóbe aýdanynda BQO erikti múgedekter qoǵamy aýdandyq fılıalynyń tóraǵasy Erkinbek Jánibekov keń jolaqty ǵalamtor jelisin jolǵa qoıý, jergilikti jerde janar-jaǵarmaı baǵasyn turaqtandyrý úshin jańadan beket salý jónindegi oıyn jetkizdi.
Ǵalamtor máselesi Syrym aýdany úshin de ózekti bolyp otyr. Oǵan qosa 7 myńdaı halyq turatyn Jympıty aýylyn taza sýmen tolyq qamtý kún tártibinen túspeı keledi. Aýdan ortalyǵy 2014 jyly «Aq bulaq» baǵdarlamasy arqyly ortalyqtandyrylǵan aýyz sýmen qamtý júıesine qosylǵanymen, bul - jetkiliksiz. Endi Jympıtyǵa Josaly aýyldyq okrýgindegi Keńaşy jerasty sý qorynan uzyndyǵy 75 shaqyrymdy quraıtyn qubyr tartý kózdelýde. Sonda Jympıty ǵana emes, basqa da birqatar eldi mekenderge taza sý jeter edi. Joba quny - 1,7 mlrd teńge shamasynda.
«Biz mundaı mańyzdy usynys-tilekterdi barynsha eskerip, tıisti organdarǵa qozǵaý salatyn bolamyz. Kóptegen máseleler sheshilip jatqanymen, túıtkildi jaıttar bar. Mysaly, turǵyndar sany 1,5 myńnan aspaıtyn eldi mekenderde dárigerler joq. Buryn muǵalimder men medıtsına salasynyń qyzmetkerleri 25 jyl qyzmet etse, zeınetke shyǵa alatyn. Endi olarǵa 63 jasqa deıin ter tógýge týra keledi. Shyndyǵynda kóz maıyn taýysyp, bilim beretin ustazdar nemese aýyldyq jerde tynbaı eńbek etetin dáriger, medbıkelerdiń jumysy ońaı emes. Ardagerler de jeńildik, ózderiniń kim ekendigin tanyta alatyn kýálik suraıdy. Biz osylardyń bárine túsinistikpen qarap, múmkindigine qaraı sheshilýine yqpal jasaıtyn bolamyz», dedi «QazAqparat» tilshisine Erbolat Muqaev.
Búgin depýtattar Tasqala aýdanynda da bolyp, tynys-tirshiligimen tanysty. Bul joly senatorlarmen Májilis depýtaty Baqtııar Máken de birge júrdi.
