Turǵyndardyń kópshiligi TV-dan radıony artyq sanaıdy - sheteldik sarapshy

ASTANA. QazAqparat - Aýdıtorııaǵa júrgizilgen zertteýler boıynsha, álem halqy teledıdarǵa qaraǵanda radıo tyńdaǵandy jón kóredi. Bul pikirdi Radıo men jańa medıa salasyndaǵy halyqaralyq sarapshy Stıv Ahern Astanada ótip jatqan «Radio Asia 2018» halyqaralyq konferentsııasynda aıtty, dep habarlaıdy QazAqparat tilshisi

«Sońǵy jyldary jańa medıa radıony óltiredi degen boljamdar bolǵan. Shyn máninde alańdaýdyń esh qajeti joq. Barlyǵymyz kórip otyrmyz, radıo qanshama jańa medıany bastan ótkerdi. Aýdıo tárizdi radıo da óz jumysyn jalǵastyra beredi. Árıne, qazirgi ýaqytta radıostantsııalar túrli platformalarda habar taratady. Aýdıojazbalardy podkast túrinde jarııalap, júktep alýǵa múmkindik beredi. Bul - jaqsy úrdis», - dedi Stıv Ahern «Radio Asia 2018» halyqaralyq konferentsııasynda.

Halyqaralyq sarapshynyń pikirinshe, radıo tyńdaýshylardyń qatary kúnnen-kúnge kóbeımese, azaıǵan joq.

«Aýdıtorııaǵa júrgizilgen zertteý boıynsha, teledıdarmen salystyrǵanda, adamdar kartına men obrazdy tolyq elestetý úshin radıo tyńdaǵandy jón kóredi. Onyń ústine, adam jumystan bosaı almaı jatsa da, radıo tyńdaı alady. Radıo ár adamnyń jeke álemine aınalyp barady, - dep sózin tolyqtyrdy ol. - Qazirgi radıoformattardan aqparattyq ta, oıyn-saýyq sıpatty da kórýge bolady. Aqparattyq formatty tyńdaý arqyly adamdar myna kúrdeli álemdi túsinýge qadam jasaıdy. Bir jaǵynan, kúıbeń tirshilikten sharshaǵan adamdar án tyńdap, sergı alady. Radıo formatty ázirlegende osy eki baǵytqa aıryqsha kóńil bólgen jón», - deıdi Stıv Ahern.

Uıymdastyrýshylardyń aıtýynsha, Astanada uıymdastyrylǵan úsh kúndik «Azııa medıa dıalogyna» álemniń 40 elinen 150-den astam delegat keldi. Forým baǵdarlamasy úsh iri sharadan quralǵan: «Azııa elderindegi radıo», «Azııa án festıvali» jáne «Medıa 2020» forýmy. Forým sessııalarynyń biri feık-jańalyqtarǵa arnalady.