Turǵyndardyń basym bóligi densaýlyq salasyndaǵy memleket kepildik bergen quqyqtardy bilmeıdi - Densaýlyq saqtaý mınıstri
ASTANA. 18 aqpan. QazAqparat - Turǵyndardyń basym bóligi densaýlyq salasy boıynsha memleket kepildik bergen quqyqtardy bilmeıdi.
Bul týraly búgin Parlament Májilisindegi Úkimet saǵatynda Densaýlyq saqtaý mınıstri Salıdat Qaıyrbekova málim etti.
«Densaýlyq saqtaý qyzmetine beriletin baǵa usynylǵan medıtsınalyq qyzmettiń sapasyna qatysty ekenin moıyndaımyz. Al bul baǵytta turǵyndar tarapynan aryz-shaǵymdar bolmaı qoımaıtyny taǵy belgili. Degenmen, shaǵymdar qurylymyna úńilsek, olardyń basym bóligi sapaly qaraý men emdeýge, ýaqytsha eńbekke jaramsyzdyǵyn beretin anyqtamanyń negizdiligine, sondaı-aq naýqastardy qabyldaýdy uıymdastyrýǵa (eń bastysy medıtsına mekemelerindegi kezek máselesi) qatysty bolyp otyr. Al kelip túsken shaǵymdardyń úshten bir bóligi negizdi bolyp tabyldy», - deıdi mınıstr Salıdat Qaıyrbekova. Onyń aıtýynsha, aryz-shaǵymdardyń basym bóliginde turǵyndardyń memleket kepildik bergen quqyqtardy bilmeıtindigi belgili bolǵan.
«Jalpy densaýlyq saqtaý salasyndaǵy dástúrli júıeniń barynsha synǵa ushyraýyna qaramastan, táýelsiz zertteýshilerdiń derekterine súıensek, 82 paıyz respondentter densaýlyq saqtaý júıesine qanaǵattanatyndyqtaryn jetkizgen. Bul júıeniń «nashar» jaǵdaıyna qatysty árbir 6-shy suralýshy atap ótken. Bul problemalardy sheshýdi byltyrdan beri qolǵa alyp kelemiz», - deıdi mınıstr.
