Turǵyndardy jelide balaǵattaǵan Şýche ákimi qatań sógis aldy

KÓKShETAÝ. QazAqparat - Áleýmettik jelide tikeleı efır arqyly ótken eseptik kezdesýde qala turǵyndaryna balaǵat sóz aıtqan Şýche qalasynyń ákimi Oljas Nurmaǵambetovke «qatań sógis» túrindegi tártiptik jaza qoldanyldy. Bul týraly QR Memlekettik qyzmet isteri agenttiginiń Aqmola oblysy boıynsha departamentiniń basshysy Dýman Ábilev málim etti, dep habarlaıdy QazAqparat tilshisi

«QR Memlekettik qyzmet isteri agenttiginiń Aqmola oblysy boıynsha departamentimen áleýmettik jelilerge monıtorıng júrgizý barysynda Býrabaı aýdany Şýche qalasynyń ákimi Oljas Nurmaǵambetovtyń «Instagram» áleýmettik jelisindegi dóreki sózine qatysty jarııalanymdar anyqtaldy. Sonymen qatar, ákimniń is-áreketi qoǵam tarapynan jaǵymsyz qoǵamdyq rezonans pen synǵa alyp keldi. Atalǵan derekti, sondaı-aq jarııalanymdarda baıandalǵan mán-jaılardy zerdeleý nátıjeleri boıynsha bıylyǵy jylǵy 8 tamyzda Departamentpen memlekettik qyzmetshilerge tártiptik jaza qoldaný qaǵıdalarynyń 34-tarmaǵyna sáıkes Oljas Nurmaǵambetovke Qazaqstan Respýblıkasy memlekettik qyzmetshileriniń ádep kodeksiniń normalaryn buzǵany úshin tártiptik jaza qoldaný úshin materıaldar Býrabaı aýdanynyń ákimine joldandy. Býrabaı aýdany ákiminiń 2023 jylǵy 8 tamyzdaǵy ókimimen Oljas Nurmaǵambetovke «qatań sógis» túrinde tártiptik jaza qoldanyldy», - dep beıneúndeý jasady Dýman Ábilev áleýmettik jelidegi paraqshasynda.

Sonymen qatar, departament basshysy Ádep kodeksine sáıkes memlekettik qyzmetshiler azamattarmen qarym-qatynasta ádeptilik tanytý, dórekilik, qadir-qasıetin kemsitý, ádepsizdik jáne beıádep minez-qulyq faktilerine jol bermeý, ózderiniń áreketterimen jáne minez-qulqymen olardyń tarapynan synǵa sebepker bolmaýy qajet ekendigin eske saldy.

Aıta ketsek, budan buryn Şýche ákimine qatysty qyzmettik tekseris júrip jatqandyǵyn jazǵan edik.