Turǵyndardy 49 mln teńgege shyǵynǵa batyrǵan: Atyraýda qarjy pıramıdasyn qurǵandar ustaldy

ASTANA. QazAqparat - Atyraýda qarjy pıramıdasyn qurǵan tulǵalar áshkerelendi, dep habarlaıdy QazAqparat QR Qarjy monıtorıngi agenttiginiń baspasóz qyzmetine silteme jasap.

Baspasóz qyzmetiniń málimetterine qaraǵanda, atalǵan azamattar «QazHome» tutyný kooperatıviniń jeke jáne zańdy tulǵalardyń aqshasyn nemese ózge de múlkin tartýdan kiris alý, keıbir qatysýshylardyń aktıvterin qaıta bólý jáne basqalardyń jarnalary esebinen baıytý qyzmetin uıymdastyrdy.

Osy fakti boıynsha qylmystyq isti QMA Atyraý oblysy boıynsha departamenti tergep jatyr.

Tergeý barysynda anyqtalǵandaı, kooperatıv qyzmetine 296 salymshy tartylǵan. Olardyń tek 35-i ǵana shaǵymdanyp, aryz jazdy.

Aryzdar boıynsha zalal somasy 49 mln teńgeden asady.

Qazirgi ýaqytta qylmystyq is sotqa jiberildi.

«QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi»,-delingen baspasóz-baıanynda.