Turǵyndar usynys joldaıtyn «Berekeli bastaý» baǵdarlamasyna Pavlodar qalasy qosyldy
«Ózderińizge belgili, Memleket basshysy óziniń halyqqa Joldaýynda azamattardyń naqty qajettilikterine sáıkes, ondaǵan abattandyrý jobalary júzege asyrylǵanyn atap ótken bolatyn. Budan keıin abattandyrý men turǵyn-úı kommýnaldyq sharýashylyqqa arnalǵan bıýdjetke halyqtyń qatysýyn arttyrý kerektigin, onyń óte mańyzdy ekenin aıtty. Sonymen qatar, «halyq únine qulaq asatyn memleket» ustanymy sheńberinde memleket apparaty azamattar múdesi úshin jumys isteýi kerek. Osyǵan baılanysty QR Indýstrııa jáne ınfraqurylymdyq damý mınıstrligi Q88 ýrbanıster qaýymdastyǵymen birlesip, qazirgi tendentsııalardy eskere otyryp, «Berekeli bastaý – qalalyq bastama» baǵdarlamasyn iske qosty», - dedi QR Indýstrııa jáne ınfraqurylymdyq damý vıtse-mınıstri Erkebulan Daýylbaev Ortalyq kommýnıkatsııalar qyzmetinde ótken baspasóz máslıhatynda.
Bastamada alǵashqy eki qala retinde Aqtaý men Atyraý tańdalǵan edi. Atalǵan qalalardyń oramdary men aýdandaryn, onyń ishinde ınjenerlik ınfraqurylymdy, turǵyn úı qoryn jańǵyrtý men abattandyrýdy damytýdyń keshendi tásilin qarastyrý josparlanýda. Onda jobalar paketin jasaý jáne basyp shyǵarý, turǵyndardan usynystar jınaý, osy qalalardyń turǵyndarynyń daýys berýi arqyly jobalardy irikteý jáne jeńimpaz jobalardy odan ári iske asyrý qarastyrylǵan.
«Búgingi kúni «Berekeli bastaý» baǵdarlamasynyń saıtynda Aqtaý jáne Atyraý qalalaryn damytý baǵdarlamasynyń habarlandyrýy jáne tusaýkeseri jarııalanyp, qoǵamdyq tyńdaýlar ótip, turǵyndardan usynystar jınalýda. Aqtaý qalasynan - 52, Atyraý qalasynan 45 usynys tústi. Usynystardy jınaý 2022 jyldyń 1 sáýirinde aıaqtaldy. Keleshekte Qazaqstannyń Pavlodar, Shymkent, Taraz, Sátbaev sııaqty qalalaryn qamtýdy josparlap otyrǵandyqtan, jobaǵa qosylatyn kelesi qala retinde – Pavlodar tańdaldy. Sonymen 8 sáýirden 8 maýsymǵa deıin usynystardy jınap, odan keıin 11 maýsymnan daýys berýdi bastap, jobany irikteýdiń barlyq kezeńderinen ótken jáne jeńip shyqqan jobalardy júzege asyrýǵa kirisý qajet», - dedi E. Daýylbaev.
Aıta keteıik, jyl basynda Qalalardy sapaly josparlaý Berekeli bastama platformasynda talqylanatyny jarııalanǵan edi. Portalda qalanyń ár turǵyny ınfraqurylymdy jaqsartý boıynsha óz usynystaryn bere alady. Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady.
