Turǵyndar temirjol ústinen asar ádisimen ótkel salýda - Qyzylorda oblysy
QYZYLORDA. QazAqparat - Jańaqorǵan kentiniń irgesindegi «Saıajaı» móltekaýdany turǵyndarynyń aýdan ortalyǵyna qatynaýy úshin temirjol ústinen kólik ótkeli salynýda, dep habarlaıdy QazAqparat tilshisi.
Azamattar birigip, asar ádisimen salynǵan qurylys sapasyna aýdan ákiminiń orynbasary Serqoja Ydyrysov pen «Nur Otan» partııasy aýdandyq fılıaly tóraǵasynyń birinshi orynbasary Májıt Balqojaev oń baǵasyn berdi.
Shaǵyn aýdan turǵyndary kóp ıgiligi úshin eńbek etken azamattar qatarynda Álaıdar Ábýov pen Orazqoja Isaevty aıtady. Olar «KamAZ» kóligimen topyraq tasyp, ortaq iske ózderiniń úlesterin qosypty. Jergilikti turǵyn Arafat Bekturǵanov ta jeke kóligimen qyzmet jasaǵan.
- Jalpy, bul kópir asar ádisimen salynyp jatyr. «Birigip istegen iste bereke bolady» demekshi, aǵaıynnyń aýyzbirshiligi nátıjesinde arman bolǵan asýdy eńserdik. Bul jumystarda kent ákimi Allabergen Ahmetov, turǵyn úı-kommýnaldyq sharýashylyǵy jolaýshylar kóligi jáne avtomobıl joldary bóliminiń basshysy Esdáýlet Seıilov pen «Shalqııa TsINK» AQ basqarma tóraǵasynyń keńesshisi Najmaddın Musabaevtyń da sińirgen eńbekteri az emes, - dedi osy istiń basy-qasynda júrgen aýdandyq máslıhattyń depýtaty Serik Abdýllaev.
