Turǵyndar sanıtarııa normalaryn qatań saqtasa, medıtsına qyzmetkerlerine aıtqan alǵystyń úlkeni sol – elorda ákimi
NUR-SULTAN. QazAqparat - Elorda ákimi Altaı Kólginov medıtsına qyzmetkerlerimen kezdesip, karantın kezindegi orasan eńbekteri úshin alǵys bildirdi. Bul týraly Nur-Sultan qalasynyń ákimi óziniń «Instagram» paraqshasynda jazdy.
«Medıtsına qyzmetkerleri – búginginiń batyrlary. Olardyń árqaısy adam ómiri úshin kúresedi. Pandemııa kezinde densaýlyq saqtaý júıesine túser salmaq artty. Bizdiń dárigerler on aıdan beri koronavırýspen kúreste kúndiz-túni aıanbaı, aldyńǵy shepte jumys istep keledi. Bul degenimiz – aýyr jaǵdaıdaǵy kópsaǵattyq jumystar, jaqyndarynan jyraqta, únemi taǵyp júrgendikten, álpetindegi betperdeniń izi men daǵy. Osy ýaqyt ishinde medıtsına qyzmetkerleri koronavırýs juqtyrǵan 16 myńnan asa adamdy qutqardy.
Jumysyn janyn salyp isteıtindikten ár naýqas olardyń júreginde desek bolady. Óıtkeni ómirine qater tóngen ýaqytta, jasandy jeldetkish apparattarynan alǵash oıanyp, kózin ashqan kezde qasynda solar bolady. Pandemııa kezinde medına qyzmetkerleri ózderiniń kásibı jáne adamgershilik qyrlaryn kórsetti. Olar birinshi ınfektsııalyq statsıonarlardaǵy jumysqa kirisip, shetelden ushyp kelgen jolaýshylardy qabyldap, blokaostarda kezekshilik atqardy. Medıtsınalyq joǵary oqý oryndary men kolledjderiniń stýdentteri, volonterler kómekke keldi.
Prezıdenttiń tapsyrmasy boıynsha, memleket tarapynan medıtsına qyzmetkerlerine tıisti qarjylaı qoldaý kórsetildi. Sondaı-aq, ákimdik qorynan qosymsha syıaqylar birneshe márte berildi. Medıtsına mekemeleri qosymsha jabdyqtarmen, qorǵanys zattarymen, dári-dármekpen qamtamasyz etildi. Jedel járdem stantsııasynyń jumysy kúsheıtildi. Kólik qozǵalysy qaýyrt kezderde ahýal ortalyǵy naýqastardy statsıonarlarǵa bólý jumysyn der kezinde uıymdastyryp otyrdy. Іndet kúsheıgen ýaqytta qońyraýlar sany 3-4 esege deıin kóbeıdi.
Qazir shuǵyl jaǵdaı bolsa, bir ýaqytta 18 nysandy jumyldyra alamyz. Bul – shamamen 7 myń oryn. Ondaı aýyr júktemeni birden artýǵa bolmaıtynyn túsiný kerek. Olardy qaı naýqasqa buryn kómektesý keregi jóninde tańdaý jasaıtyn jaǵdaıǵa jetkizbeý qajet. Sol sanaýly mınýt tek naýqastyń densaýlyǵyna emes, óziniń ómirine de qaýip tóndirýi múmkin.
Tek sanıtarlyq normany saqtaý arqyly ǵana koronavırýstyń taralýyna jol bermeýge bolady. Aldaǵy mereke kúnderi sanıtarlyq-epıdemıologııalyq talaptardyń buzylýy saldarynan - densaýlyqqa baılanysty demalys kúnge aınalmasyn. Qala turǵyndary sanıtarııa normalaryn qatań saqtasa, medıtsına qyzmetkerlerine aıtqan alǵystyń úlkeni sol bolar edi», - dep jazdy Altaı Kólginov.
