Turǵyndar otbasylyq sharalardy antısanıtarlyq tar jerlerde tyǵylyp ótkizýge májbúr - Berik Dúısenbınov
«Aq jol» fraktsııasynyń depýtattary óńirlerde kásipkerlermen kezdesý barysynda birqatar máselelerdi talqylaǵan bolatyn. Solardyń ishinde restoratorlarmen karantın shekteýlerine qatysty másele qyzý pikirtalas týǵyzdy. Osy bıznestiń ókilderi otbasylyq is-sharalardy ótkizýge tyıym salýdy alyp tastaýdy talap ete otyryp, óz tarapynan usynystar paketin de daıyndap qoıǵan. Mysaly, qyzmetkerlerdi 100 paıyz vaktsınatsııalaý, «Ashyq» júıesin qoldaný, úı-jaılardy dezınfektsııalaý, kelýshiler tolymdylyǵyn 30-50 paıyzdan asyrmaý, bir kelýshige 4 sharshy metr jerden kem bolmaýy jáne taǵy basqalary.
Olardyń aıtýynsha, pandemııanyń alǵashqy kúnderinen bastap, ózderi karantın sharalaryna belsendi túrde yqpal etken, jumystaryn toqtatyp, jumyssyz qalǵan qyzmetkerlerge jınaqtarynan jalaqy tólep, aýrýhanalarǵa qajetti jabdyqtar men jeke qorǵaný quraldaryn satyp alýǵa kómektesip, búginde muqtaj adamdarǵa dári-dármekpen, azyq-túlikpen kómektesýdi jalǵastyrýda», - dedi B. Dúısenbınov Premer-Mınıstrdiń orynbasary Eraly Toǵjanovqa joldaǵan saýalynda.
Depýtattyń sózine qaraǵanda, qazirgi kezde kásipkerlerdiń jınaǵan qorlary da, shydamdary da taýsyldy. Kúndelikti turmys-tirshilik shyǵyndaryna qosa, shekteýlerge baılanysty jumyssyz bos turǵan ǵımarattardyń kommýnaldyq tólemderi, ony qarap, kúzetýge ketetin tólemder kásipkerlerge jyǵylǵannyń ústine judyryq bolyp otyr.
«Ókinishke qaraı, vırýs ómirimizdiń turaqty faktoryna aınalýda. Al ómir jalǵasýda: jastar otbasyn qurady, adamdar ómirge keledi jáne dúnıeden ótedi. Bizdiń halqymyz qyzyǵyn da, qaıǵysyn da jaqynymen birge bólisken edi. Al búginde azamattarymyz keń ǵımarattarda saqtyq sharalaryn saqtaı otyryp ótkizetin otbasylyq sharalardy antısanıtarlyq tar jerlerde tyǵylyp ótkizýge májbúr. Otbasylyq sharalardy ótkizýge ruqsat bermeý, shyn máninde, indettiń taralýyn toqtatýǵa esh áser etip otyrǵan joq. Shekteý sharalary kózboıaýshylyqqa, indetpen kúrestiń beıshara kórinisine, korrýptsııaǵa aınaldy. Resmı túrde shekteý bolǵanymen, is júzinde januıalyq sharalar men toı jıyndar páterlerde, jeke úıler men kózden tasa kafelerde ótip jatyr. Onyń ústine, óńirlerde sheneýnikterge jaqyndyǵy bar nemese «qajet jerde» qunyn tólegen meıramhanalar táýlik boıy eshqandaı shekteýsiz, qonaqtar sanyna qaramaı jumys isteıtindigi de eshqandaı da qupııa emes», - dedi depýtat.
«Sondaı-aq, qoǵamdyq kólikterdegi ıin tiresken adamdar men Halyqqa qyzmet kórsetý ortalyqtaryndaǵy uzyn-sonar kezekterdi kórgende qandaı sanıtarlyq normalar týraly aıtýǵa bolady?!», - dep toqtaldy Berik Dúısenbınov.
Joǵaryda aıtylǵandardy eskere otyryp, «Aq jol» fraktsııasynyń depýtattary Úkimetke osy máseleni jedel qarastyryp, shuǵyl sheshim qabyldaý maqsatynda birneshe balamaly jobalar:
1) otbasylyq sharalardy ótkizýge tyıym salynatyn bolsa, onda búginde shekteýdiń nátıjesinde qańyrap bos turǵan ǵımarattardy odan ári paıdalaný, olardy jańa maqsatqa beıimdeýge, ıaǵnı mektepter, aýrýhanalar, sport mekemelerine aınaldyryp, qaıta jabdyqtaýǵa kómektesýdi;
2) eger otbasylyq sharalar ótkizýge ruqsat etilgen jaǵdaıda, daǵdarystan shyǵarýǵa qaýqarly, qajetti, ári kásipkerlerge túsinikti, ádil sharalardy qarastyra otyryp, shekteýden retteýge kóship, bıznes obektilerin qaıta jandandyrýdy jáne restoratorlardyń karantın talaptaryn oryndaý maqsatynda ázirlegen usynystar paketin qarastyrýdy;
3) indetti fors-major retinde resmı túrde moıyndap, toqtap turǵan shaǵyn jáne orta bıznes obektileri boıynsha kommýnaldyq tólemderge, múlik salyǵyna jumsalatyn basqa da shyǵyndardy óteýdi usynady.
