Turǵyndar kolesa.kz saıtyndaǵy jalǵan habarlandyrýlarǵa aldanýda
NUR-SULTAN. QazAqparat –Internet-saıtqa jalǵan habarlandyrý ornalastyryp, eki azamattyń 8 mln teńgesin ıemdengen alaıaq sottaldy. Bul týraly QazAqparat Nur-Sultan qalalyq sotyna silteme jasap habarlaıdy.
Sot aqparatyna sáıkes, azamat D. 2018 jyly kolesa.kz ınternet-saıty arqyly naryqtaǵydan arzan baǵamen premıým-sanattaǵy kólikterdi satatyny týraly habarlandyrý ornalastyrǵan.
Sóıtip, bıyl sáýir aıynda 2012 jyly shyqqan «Toyota Land Cruiser» kóligin 8 mln teńgege satyp alǵysy kelgen elorda turǵynyn aldap soqqan. Ol is júzinde joq avtomobıldi memlekettik mekemeden satyp alý qajettigin aıtyp, odan 4 mln teńge alǵan.
Sondaı-aq bıylǵy maýsym aıynda saıttaǵy habarlandyrý boıynsha 2014 jyly shyqqan «Nissan Patrol»-dy 7,5 mln teńgege satyp almaq bolǵan taǵy bir azamatty san soqtyrǵan. Onyń 4 mln teńgesin ıemdenip, óz mindettemelerin oryndamaǵan.
«Nur-Sultan qalasy №2 Esil aýdandyq sotynyń úkimimen azamat D. QR QK-niń 190-baby 3-bóligi 1-tarmaqshasyna sáıkes kináli dep tanylyp, oǵan 3 jyl 6 aı merzimge bas bostandyǵynan aıyrý jazasy taǵaıyndaldy. Sondaı-aq sottyń osy úkimimen zardap shekkenderdiń árqaısysynyń paıdasyna 4 mln teńge óndirip alyndy. Úkim zańdy kúshine endi», - dedi sottan.
