Turǵyndar qandaı qylmys boıynsha jıi aryzdanady
1 aqpanda QR ІІM búgin jańa servıs – «102» mobıldi qosymshasyn iske qosqan edi. Qosymshany Android júıesindegi smartfondarǵa arnalǵan Play Market-ten jáne IOS júıesindegi smartfondarǵa arnalǵan App Store-dan júkteýge bolady.
«Bul qosymsha – «Halyq únine qulaq asatyn memleket» tujyrymdamasy aıasynda Іshki ister mınıstri Erlan Turǵymbaevtyń tapsyrmasymen jasalǵan úlken joba. Buǵan deıin azamattar tek qana 102 nómirine qońyraý shalatyn, al qazir kópkanaldy júıe arqyly, ıaǵnı áleýmettik jeliler, mınıstrlik saıty, Telegram-bot jáne «102» mobıldi qosymshasy arqyly habarlasatyn múmkindik bar», - dedi Sáken Sársenov Nur-Sultan qalasynyń jedel basqarý ortalyǵynda ótken tanystyrylymda.
Mobıldi qosymshanyń taǵy bir ereksheligi – shaǵymdanýshynyń aty-jóni, meken-jaıy, ornalasqan jeri avtomatty túrde qoljetimdi bolady.
«Buryn 102-ge qońyraý shalǵanda polıtseıler shaǵymdanýshynyń aty-jónin, mekenjaıyn suraıtyn, oǵan ýaqyt ketetin. Al qazir mobıldi qosymshada aýdıo-vıdeoqońyraý jasaǵanda qaı jerden habarlasqanyńyzdy avtomatty túrde kóredi jáne oqıǵa ornyna jedel túrde jaqyn mańdaǵy polıtsııa jasaǵyn jiberedi. Mundaǵy qońyraýlar sol óńirdegi operatıvti ortalyqqa birden túsip otyrady», - dep túsindirdi mınıstrlik ókili.
1 aqpannan beri mobıldi qosymshany 5 myń azamat ornatqan, 2283 qońyraý shalynǵan, onyń ishinde 1200-i testik túrde, qalǵandary – polıtsııaǵa kómek surap júgingender.
«123 habaralma kelip tústi, sonyń ishinde balalar men áıelderge qatysty zorlyq-zombylyq jáne kólik apattary týraly habarlamalar jıi kezdesti. Eń belsendi óńirler – Nur-Sultan men Almaty qalalary jáne Pavlodar oblysy. Qosymshany qazaqstandyq mamandar ázirlegen, aqparattyq qaýipsizdik jáne derbes derekterdiń saqtalýy máselelerin Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip sheshtik», - deıdi Sáken Sársenov.