«TURGYNDAR AMANATY»: Atyraýda turǵyn úı salasyn jańǵyrtýdyń naqty qadamdary aıqyndaldy
ATYRAÝ. KAZINFORM – Atyraýda «TURGYNDAR AMANATY» jobasy aıasynda partııanyń uıymdastyrýymen óńirlik forým ótti.
Іs-shara turǵyn úı-kommýnaldyq sharýashylyq salasyndaǵy ózekti máselelerdi talqylaıtyn mańyzdy dıalog alańyna aınaldy.
Forýmǵa Atyraý oblysynyń ákimi Serik Shápkenov, «AMANAT» partııasynyń hatshysy Erjan Jylqybaev, QR Parlamenti Májilisiniń depýtaty Dúısenbaı Turǵanov jáne sala ókilderi qatysty.
Erjan Jylqybaev jobanyń kópqabatty úılerdi basqarýdy jetildirýge jáne turǵyndardyń qatysýyn arttyrýǵa baǵyttalǵan tıimdi tetik ekenin atap ótti.
Onyń aıtýynsha, basty mindet – máselelerdi júıeli túrde sheshý. Osyǵan baılanysty MIB jáne PIK tóraǵalaryn oqytý, keri baılanysty kúsheıtý, «Halyq qatysatyn bıýdjet» baǵdarlamasyn engizý jáne belsendi azamattardan kadrlyq rezerv qalyptastyrý josparlanǵan.
Dúısenbaı Turǵanov turǵyn úı salasyndaǵy reformalar menshik ıeleriniń rólin kúsheıtip, basqarý ashyqtyǵyn arttyrýǵa baǵyttalǵanyn aıtty. Endi turǵyndar basqarý nysanyn ózderi tańdap, tarıfterdi bekitip, qarjynyń jumsalýyn baqylaı alady.
Oblys ákiminiń orynbasary Qaırat Nurtaev óńirde sý júıesin tsıfrlandyrý, apatty úılerdi kóshirý jáne elektr jelilerin jańǵyrtý jumystary júrgizilip jatqanyn jetkizdi. 801 úıge sý eseptegish ornatylyp, sý tutyný 7%-ǵa azaıdy, 624 páter jańa baspanaǵa kóshirildi.
Forým qorytyndysynda Serik Shápkenov turǵyndar men basqarýshy uıymdar arasyndaǵy baılanysty kúsheıtý úshin front-ofıs qurýdy usyndy. Nátıjesinde salany damytýǵa baǵyttalǵan naqty usynystar qabyldanyp, belsendi azamattar marapattaldy.
