Turǵyn úılerdi jóndeýge qarajat jınaý tetikteri reglamentteledi
«Turǵyn úı-kommýnaldyq sharýashylyq salasyn reformalaý maqsatynda mınıstrlik «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań jobasyn ázirledi. Zań jobasynda Qazaqstan Respýblıkasynyń úsh Kodeksine jáne 12 zańyna ózgeris engizý kózdelgen», - dedi Úkimettiń selektorlyq rejimdegi otyrysynda atalǵan másele boıynsha baıandama jasaǵan QR Investıtsııalar jáne damý mınıstri Jeńis Qasymbek.
Osy rette ol zań jobasyndaǵy birqatar tujyrymdamalyq túzetýlerdi atap ótti.
«Birinshi - turǵyn úılerdi aǵymdaǵy jáne kúrdeli jóndeýge qarajat jınaý tetikterin reglamentteý.
Bul úshin kúrdeli jóndeýge menshik ıeleri aı saıyn ekinshi deńgeıli banktegi jınaq shotyna páterdiń/turǵyn emes úı-jaıdyń paıdaly alańynyń 1 sharshy metrine 0,02 ese AEK kólemindegi somany salady. Qarajattyń jartysy jınalǵannan keıin bank kúrdeli jóndeý jumystaryna kredıt berýge quqyly», - deıdi ol.
Mınıstrdiń aıtýynsha, ekinshiden - basqarý organdary qyzmetin turǵyndardyń baqylaýyn qamtamasyz etý jáne menshik ıeleri, basqarýshy kompanııalar, qyzmet kórsetýshi uıymdar jáne ákimdikter arasyndaǵy ózara is-qımyldy jaqsartý úshin turǵyn úı-kommýnaldyq sharýashylyǵynyń biryńǵaı aqparattyq júıesin qurý.
«Kelesi ol - memlekettik turǵyn úı qorynan baspana alý kezegin avtomattandyrý jáne túgendeý. Qazirgi ýaqytta mınıstrlik «Kezekte turǵandardyń biryńǵaı respýblıkalyq derek qory» servıstik baǵdarlamalyq ónimin ázirlep, paıdalanýǵa engizdi. Bıyl shilde aıynda servıstik baǵdarlamalyq ónimdi qoldana otyryp, qaıta túgendeý júrgizildi. Qazirgi ýaqytta mınıstrlik osy derekterdiń negizinde atalǵan zań buzýshylyqtardy zańnama talaptaryna sáıkestendirý úshin jergilikti atqarýshy organdarmen jumys istep jatyr», - dedi Jeńis Qasymbek.
Munan bólek, zań jobasynda jergilikti atqarýshy organdar bekitetin paıdalaný shyǵyndarynyń eń tómen mólsherin belgileý qarastyrylǵan. Ol kóppáterli turǵyn úıdi basqarý, sanıtarlyq tazalaý, avarııalyq jaǵdaılardy joıý, tehnıkalyq qyzmet kórsetý boıynsha tólem mólsherin qalyptastyrýdyń biryńǵaı tásilderin anyqtaýdy qamtıdy.
«Páterler men turǵyn emes úı-jaı menshik ıeleriniń negizgi quqyqtary men mindetteri qarastyrylǵan. Munda barlyq páterler men turǵyn emes úı-jaılardyń menshik ıeleri ortaq múlikti teń paıdalaný quqyǵyna ıe jáne olar kóppáterli turǵyn úıdiń ortaq múlkin saqtaý men ony qaýipsiz paıdalanýdy qamtamasyz etýge, kúrdeli jóndeý jáne taǵy da basqa sharalardy qabyldaýǵa mindetti bolady»,- dedi ol.
