Turǵyn úılerdi termojańǵyrtýdan ótkizgennen keıin jylý shyǵyndary 2 ese tómendeıdi

ASTANA. 26 sáýir. QazAqparat - Turǵyn úılerge tolyq termojańǵyrtý arqyly kúrdeli jóndeý júrgizgennen keıin jylý shyǵyndaryn 2 ese qysqartýǵa qol jetkizýge bolady.

Bul týraly búgin elordada «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ-nyń qyzmetin tanystyrǵan ortalyq basshysy Tóleýtaı Rahymbekov aıtty.

Onyń atap ótýinshe, páter ıelerine jóndeý jumystarynyń eki paıdasy bar. Birinshiden, jylýǵa tóleıtin shyǵyndaryn aıtarlyqtaı tómendetedi. Ekinshiden, páterdiń naryqtyq quny shamamen 30-40 paıyzǵa qymbattaıdy.

T.Rahymbekovtiń sózine qaraǵanda kommýnaldyq sektorda da problemalar jetkilikti. Bul rette «TKSh QazOrtalyǵy» AQ atalǵan problemalardy sheshý úshin kommýnaldyq sektordy jańǵyrtýdy júıeli tásilmen júrgizýdi usynady. Oǵan ınjenerlik jelilerdiń tehnıkalyq jaı-kúıin baǵalaý jáne nysandarǵa tehnologııalyq aýdıt júrgizý, jobalyq-smetalyq qujattama ázirleý, ınvestıtsııalyq tarıfter, qarjylandyrý, jobalardy júzege asyrý jáne monıtorıng kiredi.