Turǵyn úılerdi kúrdeli jóndeýge bıýdjetten 30 mlrd teńge bólinedi– depýtat
NUR-SULTAN. QazAqparat – Qazirgi ýaqytta elimizde 78 myń turǵyn úı bar. Onyń 18 myńy kúrdeli jóndeýdi qajet etedi. Bul týraly QR Parlamenti májilisiniń depýtaty Sapar Ahmetov «Astana -Teplotranzıt» AQ jumysshylarymen kezdesýde aıtty, dep habarlaıdy QazAqparat tilshisi.
«Osy ýaqytqa deıin kóptegen zań jobasy qabyldandy. Sonyń ishinde kommýnaldyq sharýashylyq, aýyl sharaýashylyqty modernızatsııalaý jáne t.b. bar. Men turǵyn-úı kommýnaldyq sharýashyly salasyna qatysty zań jobasyna toqtalyp ótkim keledi. Men jumys tobynyń basshysy boldym. Biz turǵyn úıge qatysty zańdy túgel qaıta qarap shyqtyq. Biz birinshi ret jergilikti atqarýshy organdaryna bıýdjet qarajaty esebinen turǵyn úılerdiń ınjenerlik jelilerine kúrdeli jóndeý jumystaryn júrgizý, lıft aýystyrý quqyǵyn berdik», - deıdi Májilis depýtaty Sapar Ahmetov.
Buǵan deıin mundaı jumystarǵa bıýdjetten qarajat bólinbeıtin.
«2020-2021 jyldar aralyǵynda kúrdeli jóndeý jumystaryn júrgizý úshin respýblıkalyq bıýdjetten 30 mlrd teńge bólinedi. Bul qarajatty aımaqtarǵa bólgen kezde ár oblysqa kem degende 2 mlrd teńgeden keledi. Osy qarajatqa 800 turǵyn úıge kúrdeli jóndeý jumystaryn júrgizýge bolady», - deıdi depýtat.
Sondaı-aq, ol turǵyn úılerdi basqarý tolyǵymen ózgergeni týraly aıtty.
«Qazirgi ýaqytta jumys istep jatqan PIK (KSK) aldaǵy úsh jyl ishinde jumys isteıdi, biraq basqarý organy – Úı keńesi bolyp sanalady. Úı keńesi menshik ıeleri qaýymdastyǵynyń, basqaratyn kompanııanyń jáne páter ıeleri kooperatıviniń jumysyn qadaǵalaıtyn bolady. Budan bylaı qansha qarajat jınap, ony qaıda jumsaý kerek ekendigin úı turǵyndary sheshetin bolady. Sáıkesinshe turǵyn úı turǵyndary belsendi bolýlary kerek. Zań jobasynda turǵyn úılerdi basqarýǵa qatysty barlyq normalar jazylǵan», - deıdi ol.
Ol bir jarym jyl boıy qandaı zań jobasymen jumys istegenderi týraly toqtalyp ótti.
«Qazirgi ýaqytta elimizde 78 000 turǵyn úı bar. Onyń 18 myńy kúrdeli jóndeýdi qajet etedi. Turǵyn úılerdi kúrdeli jóndeýden ótkizý maqsatynda esepshot ashý úshin Turǵyn úı jınaq bankin iske qosamyz. Sondaı-aq, atalǵan jumystar úshin bank qosymsha qarajat bóledi. Bul jerde de qarajat neni jóndeýge ketetinin úı turǵyndary ózderi sheshedi. Bir jarym jyl boıy osy zań jobasy boıynsha jumys istedik», - deıdi ol.
