Turǵyn úıgen «bomba» qoıylǵandyǵyn habarlaǵan aqmolalyq ustaldy
KÓKShETAÝ. QazAqparat – Aqmola oblysynda terrorızm aktisi týraly telefon arqyly kórineý jalǵan habar bergen aýyl turǵyny ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, keleńsiz jaǵdaı Arshaly kentinde tirkelgen. Maýsymnyń 5-de jergilikti polıtsııa bóliminiń «112» arnaıy telefon jelisine er adam qońyraý shalyp, turǵyn úılerdiń birine «bomba» qoıylǵanyn habarlaǵan. Ol jarylǵysh zat qoıylǵan úıdiń naqty mekenjaıyna deıin aıtqan.
Aıtylǵan mekenjaıǵa polıtsııa bóliminiń jedel-tergeý toby baryp, ózge de qyzmetterge eskertti. Іzdestirý sharasy nátıjesinde jarylǵysh zat tabylmady. Tártip saqshylary sol kúni mas kúıinde qońyraý shalyp, eldi dúrliktirgen kúdikti 56 jastaǵy jergilikti turǵyndy anyqtady. Atalǵan mekenjaıda kúdiktiniń ákesi turady. Zattaı dáıek retinde kúdiktiden jalǵan málimet bergen telefon men abonenttik nómir tárkilendi», - deıdi vedomstvodan.
Qazirgi kezde, osy oqıǵaǵa baılanysty QR QK 273 baby (Terrorızm aktisi týraly kórineý jalǵan habar berý) boıynsha sotqa deıingi tergeý amaldary júrgizilýde. Polıtsııa qyzmetkerleri Qylmystyq kodekstiń 273-babyna sáıkes,«Terrorızm aktisi týraly kórineý jalǵan habarlama taratý» bes jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý nemese 5 000 AEK aıyppul kólemindegi aıyppulmen jazalanatynyn eskertedi.
