Turǵyn úıdiń jalpy qajettiligine ketetin shyǵyndardy turǵyndar emes, PIK-ter tóleýi tıis - Astana ákimi
ASTANA. Sáýirdiń 20-sy. QazAqparat /Gúlmıra Álıakparova/ - Budan bylaı Astanadaǵy jaılastyrylǵan úılerdiń turǵyndary úıdiń jalpy qajettiligine ketetin shyǵyndardy tólemeıtin bolady.
Ol mindetter páter ıeleri kooperatıvterine júkteldi. Búgin ákimdikte ótken keńeste Astana ákimi Imanǵalı Tasmaǵambetov osyǵan sáıkes tıisti tapsyrma berdi.
«Páter ıeleri kooperatıvteri týraly Zańǵa sáıkes, PIK-ter úıdiń aýlasyna, kireberister men jertóle bólmelerine ketetin shyǵyndardy ózderiniń esebinen óteýi tıis. Adamdar ol úshin aqsha tóleıdi. Sondyqtan turǵyn úıdiń jalpy qajettiligine ketetin shyǵyndar PIK-terge eseptelýi tıis. Buǵan qatysty túrli talqylaýlar bolýy múmkin, olardyń deni Zańǵa sáıkes emes, sizderdiń qarjylyq jaǵdaılaryńyzdan shyǵady. Biraq bul sizderdiń sharýalaryńyz», - dedi qala basshysy PIK basshylaryna qaratyp aıtqan sózinde.
I.Tasmaǵambetovtyń aıtýynsha, PIK-terdiń tólemge qabiletsiz bolýynan-mys, úılerdiń kireberisterin jaryqtandyrý jáne basqa da qyzmetter úshin shyǵyndar turǵyndardyń moıyndaryna ilinbeýi tıis.
Ákim óziniń orynbasary Vasılıı Krylovqa bir aıdyń ishinde barlyq qyzmettermen keńes ótkizip, turǵyn úıdiń jalpy qajettiligine ketetin shyǵyndardy PIK-terge júkteýdi tapsyrdy.
«PIK týraly qabyldanǵan zańnyń kem-ketikteri bar. Turǵyn úı qoryna sapaly qyzmet jasaý úshin atqarýshy bılik aldyndaǵy PIK-terdiń quqyqtyq jaýypkershilikterin qamtamasyz etetindeı, bıyl tıisti zańǵa ózgerister engizý týraly máseleni kóteremin», - dedi I.Tasmaǵambetov.
