Turǵyn úıdiń qasbetindegi plıtalardyń qulaýyna kim kináli?
ASTANA. QazAqparat - Astanada qatty jel tursa, kópqabatty turǵyn úılerdiń qabyrǵasynan plıtalar ushyp ketip jatady. Bundaı oqıǵaǵa elorda turǵyndarynyń eti úırengen. Osyndaı oqıǵalardyń oryn alýyna kim kináli? Mundaı jaǵdaılarda qarapaıym turǵyndarǵa ne isteý kerek? «Saryarqa» aýdanynyń turǵyn úı ınspektsııasy bóliminiń basshysy Rýstam Begalınov osy tektes suraqtarǵa jaýap berdi, dep jazady elorda ákimdiginiń resmı saıty.
- Saryarqa kóshesindegi 11-shi úıdiń turǵyndarynan shaǵym tústi. Problema ǵımarattyń qasbetin árleıtin plıtalarǵa qatysty. Sizdiń tarapyńyzdan qandaı sharalar qolǵa alyndy?
- Biz biraz tekserý jumystaryn júrgizdik. Qazirgi tańda barlyq málimetter tótenshe jaǵdaılar departamentine joldanǵan. Departamenttegiler osy oqıǵaǵa tıisti kvalıfıkatsııasyn berýi kerek. Osydan keıin QR Zańnamasyna sáıkes sharalar qoldanylatyn bolady. Úı apatty dep tanylsa, tótenshe jaǵdaılar kezinde úıdi jóndeý jumystaryn júrgizýge bólinetin qor qarajatyn jumsaý quqyǵy beriledi.
- Turǵyndar apatty jaǵdaı oryn almaı turyp, ǵımarattyń qasbetin árleıtin plıtalardyń qulaǵanyn kórse, olarǵa ne isteý kerek?
- Ǵımarattardyń qasbetteri de jalpy múlikke jatqyzylady. Bul týraly zańnamada jazylǵan. Qyzmet kórsetýshi uıym (úıdiń turǵyndary ózderi tańdaǵan PIK, JShS, JK) jylyna eki ret tekseris jumystaryn júrgizýi qajet. PIK-ter ǵana emes, mamandandyrylǵan merdiger uıymdar da osy máselelermen aınalysýy kerek. PIK-ter olardy tartý arqyly problemalyq nysandardy kórsetýi tıis. Alynǵan málimetter arnaıy aktige túsiriledi. Bul qujattar PIK-terde saqtalady. Bul - tótenshe jaǵdaıdyń aldyn alý maqsatynda júrgiziletin jumystar.
Montaj durys jasalǵan jaǵdaıda júıe qalypty túrde jumys isteıtin bolady. Kezinde qurylys jumystaryn júrgizgen kompanııa qatelikter jiberse de, PIK kepildi merzim ishinde olardy joıa alady. Kepildi merzim ishinde PIK problemalardyń barlyǵyn anyqtap, zańǵa sáıkes áreket etýi tıis bolatyn. Shaǵymdardy túsirý de zańǵa saı bolýy kerek edi.
- Kóbine 10 jyldan astam buryn salynǵan úılerdiń qabyrǵasyndaǵy plıtalar qulaıdy. Paıdalanýdyń kepildi merzimi aıaqtalǵan jaǵdaıda ne isteý kerek?
- Jylyna eki ret tekseris jumystaryn júrgizip, maqsatty alymdardy uıymdastyrý qajet. Jeldetiletin qasbet - bul úlken júıe. Ol - montaj durys jasalǵan jaǵdaıda, paıdalaný erejelerin saqtaǵan jaǵdaıda óte senimdi qurylym.
- Apatty jaǵdaı oryn aldy delik. Buǵan kim jaýap beredi?
- Búginge deıin jaýapkershilikten eshkim jaltarǵan emes. Ǵımarattyń qasbetinen qulaıtyn plıtalar kólik ıelerine zııan keltiredi. Bul - PIK-tiń moınyndaǵy jaýapkershilik. Kooperatıv zaqymdalǵan kólikti qalpyna keltirýmen aınalysady. Tótenshe jaǵdaı oryn alǵan kezde PIK-tiń jaýapkershilikten bas tartqan oqıǵalary tirkelgen joq.
- Osyǵan uqsas problemalardy sheshý úshin qalada ne istelip jatyr?
- Úsh qabattan joǵary turatyn aspaly qasbetterdiń montajyna 2011 jyldan bastap tyıym salynǵan. Sol sebepti biz apatty jaǵdaılardyń aldyn alý maqsatynda problemaly nysanǵa jatatyn úılerdiń turǵyndarymen tyǵyz qarym-qatynastamyz.
