«Turǵyn úı jınaq júıesi jańa jaǵdaıda damytylmaq» - respýblıkalyq basylymdarǵa sholý
ASTANA. Naýryzdyń 10-y. /QazAqparat/ - Qazaq aqparat agenttigi respýblıkalyq basylymdarda naýryzdyń 10-y, sársenbi kúni shyqqan ózekti materıaldarǵa sholýdy usynady.
Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda elimizdiń turǵyn úı qurylysy salasyn damytýǵa qatysty birqatar máseleler qaraldy. Sonyń biri turǵyn úı qurylys jınaq júıesin damytýǵa arnaldy. Baspana máselesi árkimdi eleń etkizetini shyndyq. Olaı bolsa bul jolǵy Úkimet otyrysy ne sheshti? Tolyǵyraq «Egemen Qazaqstan» basylymynyń búgingi sanyndaǵy «Turǵyn úı jınaq júıesi jańa jaǵdaıda damytylmaq» degen taqyryppen berilgen maqaladan oqyńyzdar.
«70 jyl boıy sahanadan túspegen týyndy». Osy taqyryppen jaryq kórgen «Egemen Qazaqstan» gazetindegi kelesi maqala qazaq halqynyń mańdaıyna bitken tereń oıly fılosof, jazba ádebıettiń negizin qalaǵan tamasha aqyn, Shyǵys pen Batys mádenıetiniń arasynda qazaqtyń tól ádebı baǵyt-baǵdaryn mýzyka arqyly aıshyqtaǵan qymbat tulǵa - Abaıymyzdyń ómiri men shyǵarmashylyǵyna, júrek tynysy men arman-qııalynyń samǵaý belesterin aıqyndaıtyn erekshe týyndy "Abaı" operasy týraly sóz qozǵapty. «Qazaqtyń memlekettik akademııalyq opera jáne balet teatry sahnasyna Abaı Qunanbaıulynyń 100 jyldyǵyn toılaý saltanaty qarsańynda qoıylǵannan beri neshe onjyldyqtar ótse de "Abaı" operasy atalmysh teatr repertýarynyń kórki bolyp keledi. M.Áýezovtyń drama teatr sahnasyna arnalǵan tragedııasynyń sahnadaǵy ekinshi uzaq ǵumyry opera janrynyń negizi - mýzykalyq dramatýrgııa arqyly qaıta túledi»,-deıdi basylym.
***
«Qarjy jaǵynan qatty qysylsa da, el Úkimeti shetelden keńesshiler shaqyrýǵa kóp qarjy shyǵyndaǵaly otyr. Bizdiń bilgenimizdeı, aqylyn aqshaǵa satatyn jatjurttyq danagóılerge másimovter jarty mıllıard teńgeni aıamady»,- dep jazdy «Aıqyn» basylymynyń búgingi sany. Úkimet olardy turǵyn úı jáne kommýnaldyq sharýashylyq salasyn túbegeıli reformalap tastaý úshin aldyrtpaq sekildi. Bul týraly tolyǵyraq gazettegi «Túńligin jańadan túrgen TÚKSh» atty maqaladan oqı alasyzdar.
«Kez kelgen salyq, ol meıli 1 paıyz bolsyn, shaǵyn kásiporynnyń tabysyn ortaıtady. Onyń ústine qosymsha sybaılas jemqorlyq salyǵy qosylady. Bul árıne, jasyryn salyq, biraq ony jurttyń bári biledi. 20 paıyzdyq salyq pen jasyryn salyq qosylǵan kezde ol eki esege ósip shyǵa keledi. Shaǵyn jáne orta bıznes ókilderiniń zar jylap júrýiniń basty sebebi sonda jatyr»,-deıdi ekonomıka ǵylymdarynyń kandıdaty, Qoǵamdyq problemalardy taldaý ortalyǵy dırektorynyń orynbasary Qanat Berentaev «Aıqyn» gezetine bergen suhbatynda. Ekonomıstiń búgingi qarjy salasy týraly oılarymen ortaqtasqyńyz kelse, gazettiń «Aq sóıle» aıdaryndaǵy suhbatqa nazar aýdaryńyz.
«Nur Otannyń» baıandy bastamasy». Osy taqyryppen jaryq kórgen «Aıqyn» gazetindegi kelesi maqala segizinshi naýryzda elimizde 1236 náreste dúnıege kelgendigin, sonymen qosa «Nur Otan» taǵy bir bastamasymen jurtty eleń etkizgenin jazypty. «Taǵy bir ıgi bastama búr jardy. 8 naýryz halqaralyq áıelder merekesi kúni ómirge urpaq ákelgen analarǵa arnaıy syı ázirlegen «Nur Otannyń» bastamasy sóz joq, qoldaýǵa turarlyq, qostaýǵa turarlyq. 8 naýryz kúni elimizdegi barsha perezenthanalarǵa arnaıy bas suqqan «nurotandyqtar» analardy qos qýanyshymen quttyqtady. «Qos merekeni» birge qarsy alǵan jas analardyń da alǵysy sheksiz»,-deıdi basylym.
***
Qazir meıramhana, kafe nemese oıyn-saýyq ortalyqtary sııaqty oryndarda ymyrt úıirile kólikter áınekterinen «sergek júrgizýshi» (trezvyı vodıtel) qyzmeti telefondary jazylǵan bir japyraq qaǵazdy jıi kórýge bolady. Alaıda suranys ázirge tym az kórinedi. Óıtkeni kópshilik mundaıǵa áli úırene qoıǵan joq. Bul qandaı qyzmet? Jurtshylyqtyń tańǵalysymen qosa, kúdigin týdyrǵan osy bir qyzmet týraly «Alash aınasy» gazetiniń búgingi sanyndaǵy «Іshsek pe, ishpesek pe?..» degen taqyryppen berilgen qyzyqty maqalany oqýǵa asyǵyńyzdar.
Qazaqtyń segiz qyrly, bir syrly qazyna qarty Shora Shamǵalıuly Sarybaev osydan týra segiz kún buryn 85 jasqa toldy. Oıy ozyq qarııanyń toıy da ózgeshe boldy...Úlkenmen de, kishimen de áńgimesi jarasqan ázilqoı qarttyń erekshe toıy týraly gazettiń 5-inshi betinde jarııalanǵan «Bitimi bólek abyz qart» degen taqyryptaǵy maqaladan oqyńyzdar.
Erlerdiń eki kózge erik berýi - óte sırek ushyrasatyn jaǵdaı. Alaıda qalyptasqan qaǵıda boıynsha naǵyz er qandaı jaǵdaıda jylap, qandaı jaǵdaıda jylamaı shydaýy kerek? Bul suraqqa jaýap izdegińiz kelse, «Alash aınasy» gazetiniń «Bilgim kelgen bir suraq» aıdaryna nazar aýdaryńyz.
