Turǵyn úı jáne áleýmettik nysandar qurylysy barysynda otandyq materıaldardy qoldanýǵa basty nazar aýdarylady
ASTANA. QazAqparat - Premer-mınıstr Baqytjan Saǵyntaevtyń tóraǵalyǵymen ótken Úkimettiń selektorlyq rejımdegi kezekti otyrysynda Elbasy tapsyrmalaryna sáıkes halyqtyń turmys deńgeıin kóterýge arnalǵan birqatar mańyzdy máseleler qaraldy. Atap aıtqanda, respýblıkadaǵy turǵyn úı jáne áleýmettik nysandar qurylysynyń barysy, sondaı-aq otandyq kásipkerlikti qoldaý jáne damytý úshin qoldanylyp jatqan sharalar jaıy talqylandy.
Táýelsizdiktiń 25 jylynda elimizde 113,2 mln. sharshy metr turǵyn úı salynyp, bul 1,0 mıllıonnan astam otbasyn turǵyn úımen qamtamasyz etýge múmkindik berdi. Turǵyn úı qurylysynyń barysy týraly baıandaǵan ulttyq ekonomıka mınıstri Qýandyq Bıshimbaev memlekettiń azamattardy turǵyn úımen qamtamasyz etý jónindegi saıasaty oń nátıje berip otyrǵandyǵyn atap ótti.
Máselen, barlyq kózderden paıdalanýǵa berilgen turǵyn úı aýdany 2016 jyldyń qańtar-tamyz aralyǵynda ótken jyldyń sáıkes kezeńimen salystyrǵanda 14%-ǵa artqan. Sonymen qatar, kóppáterli turǵyn úılerdiń aýdany 26,7%-ǵa, jeke turǵyn úı 4%-ǵa ósti. Bul turǵyda oń dınamıka saqtalyp, paıdalanýǵa beriletin turǵyn úı úshin memlekettik qarajattan 507 myń sharshy metr salyndy. Bıyl barlyq qarjylandyrý kózderi esebinen 750 mlrd. teńgege shamamen 9 mln. sharshy metr turǵyn úıdi paıdalanýǵa berý josparlanyp otyr.
Bul eń aldymen «Nurly jol» memlekettik baǵdarlamasy aıasynda qabyldanǵan sharalarmen, sondaı-aq Úkimet pen Ulttyq banktiń daǵdarysqa qarsy qabyldaǵan is-sharalarymen baılanysty. 2020 jylǵa qaraı «Nurly jol» memlekettik baǵdarlamasy arqyly 4,5 mln. sharshy metr bas¬panany paıdalanýǵa berý qaralǵan. Osy maqsatta 145 mlrd. teńge bólindi, onyń ishinde jalǵa berý jáne nesıe salý baspanasyna 2015 jyly - 122,5 mlrd. teńge, al 2016 jyly «Qazaqstandyq ıpotekalyq kompanııa» AQ arqyly jalǵa beriletin turǵyn úı qurylysyn jalǵastyrý - 22,5 mlrd. teńge. Budan ózge, bıyl Memleket basshysynyń tapsyrmasy boıynsha turǵyn úı qurylysyna qosymsha 360 mlrd. teńge bólindi, dedi Q.Bıshimbaev.
Mınıstrdiń aıtýynsha, memlekettik qarajattyń nátıjesinde ótken jyly jáne 2016 jyldyń qazirgi kúnine deıin 22,6 myń otbasyǵa baspana berildi, al jyl sońyna deıin qosymsha 6,8 myń otbasyǵa baspana qarastyrylady. 2017 jyly taǵy 33 myń páter salynady.
Bıyl jalǵa beriletin jáne kredıttik turǵyn úı qurylysyn qarjylandyrýǵa Ulttyq qordan 202,5 mlrd. teńge bólindi. Onyń ishinde 113 mlrd. teńge «Báıterek development» AQ arqyly jalǵa beriletin jáne kredıttik turǵyn úı qurylysyna; 67 mlrd. teńge ákimdikter arqyly kredıttik turǵyn úıdi qarjylandyrý úshin JAO-nyń baǵaly qaǵazdaryn satyp alýǵa; 22,5 mlrd. teńge «Qazaqstandyq ıpotekalyq kompanııa» AQ arqyly jalǵa beriletin turǵyn úı qurylysyna baǵyttalǵan.
«Báıterek» ulttyq basqarýshy holdınginiń basqarma tóraǵasy Erbolat Dosaevtyń aıtýynsha, 2016 jyly 112,1 mlrd. teńgeni ıgerý josparlanýda. Qazirgi kezde bólingen qarajattyń 74,5 mlrd. teńgesi nemese jospardyń 66,5%-y ıgerildi. Jyl sońyna deıin qurylys salýshylaryna oryndalǵan jumystar aktileri boıynsha 37,6 mlrd. teńge aýdarylatyn bolady.
Qazirgi kezde respýblıkada salynyp jatqan densaýlyq saqtaý keshenderi jóninde densaýlyq saqtaý jáne áleýmettik damý mınıstri Tamara Dúısenova, óńirlerdegi mektepter qurylysynyń monıtorıngi týraly bilim jáne ǵylym mınıstri Erlan Saǵadıev baıandady. Bul tusta da nysandar qurylystarynyń keshigýi, qarjynyń óz ýaqytynda jumsalmaýy máseleleri qozǵaldy.
Baıandamashylardy tyńdaı kele, Úkimet basshysy nysandardy salý barysyndaǵy qazaqstandyq qamtý máselesine nazar aýdardy. Qurylys kezinde otandyq materıaldardy paıdalaný mańyzdy. Búginde tek 58 paıyz deńgeıinde otandyq qurylys materıaldary paıdalanylýda. Bizge qazaqstandyq materıaldardyń úlesin 80 paıyzǵa deıin jetkizsek, bul óz kezeginde elimizdegi kompanııalarǵa eleýli qoldaý bolady, dedi B.Saǵyntaev.
Sonymen qatar Premer-mınıstr jyldyń sońyna deıin turǵyn úı qurylysynda bıylǵy jospar tıisti deńgeıde oryndalýyn tapsyrdy.
Elimizde 25 jyldyń ishinde bir mıllıonǵa jýyq otbasy baspanaly boldy. 1,4 myń mektep iske qosyldy, 1,3 myń densaýlyq saqtaý nysandary paıdalanýǵa berildi.
Sol sebepten Táýelsizdigimizdiń 25 jyldyǵyna deıin qalǵan az ýaqyttyń ishinde jospardaǵy nysandardyń barlyǵyn belgilengen merzimde tapsyryp, turǵyndarǵa jumystardyń aıaqtalǵandyǵy týraly esebimizdi berýimiz qajet. Osy rette josparly jumystardy sońyna deıin jetkizýge bizde múmkindikter jetkilikti, dedi Baqytjan Saǵyntaev Úkimet múshelerine qaratyp aıtqan sózinde.
Premer-mınıstr Memleket basshysynyń «Nurly jer» turǵyn úı baǵdarlamasyn qurý jónindegi tapsyrmasyn tıimdi jáne sapaly atqarýdyń mańyzdylyǵyn atap ótti.
