Turǵyn úı jaldaý aqysyn sýbsıdııalaý erejesi mamyr aıyna qaraı daıyn bolady

NUR-SULTAN. QazAqparat – Turǵyn úı jaldaý aqysyn sýbsıdııalaý erejesi mamyr aıyna qaraı daıyn bolýy qajet. QR Úkimet basshysy Álıhan Smaıylov Úkimet otyrysynda tıisti vedomstvoǵa osyndaı tapsyrma júktedi, habarlaıdy QazAqparat tilshisi.

Otyrys kezinde Álıhan Smaıylov Indýstrııa jáne ınfraqurylymdyq damý mınıstrliginiń eldegi turǵyn úı saıasaty jónindegi usynystaryn qoldaıtynyn aıtty.

«Sonymen birge myna máselelerdi de atap ótý qajet dep sanaımyn.

Birinshi. Turǵyn úı saıasatynyń jańa tásilderin engizýdiń mańyzdylyǵyn eskerip, Indýstrııa mınıstrligi tıisti zań jobasynyń Parlamentte depýtattarmen sapaly ári jedel pysyqtalýyn qamtamasyz etýi qajet.

Ekinshi. Indýstrııa mınıstrligi men «Báıterek» holdıngi arendany sýbsıdııalaý mehanızmin engizý boıynsha barlyq uıymdastyrý máseleleri men rásimderdi aıaqtap, osy jyldyń 1-shi mamyryna deıin naqty iske asyrýǵa kirisýige tıis», - dedi Premer-Mınıstr.

Onyń aıtýynsha, osy baǵyttaǵy rásimderdiń ashyqtyǵyn qamtamasyz etý úshin jaýapty mınıstrlik qurylys salasyn tsıfrlyq tehnologııalar arqyly retteýge arnalǵan zań jobasyn 1-shi sáýirge deıin Úkimetke engizýi qajet.

«Sondaı-aq qurylys maýsymyn ýaqtyly bastaýdyń mańyzy zor. Óńir ákimderi kún jylynǵan soń qurylys jumystaryn barynsha tezdetý úshin erte bastan jer ýchaskelerin bólýdi, jobalyq qujattardy ázirleýdi, qajetti ınfraqurylymdy júrgizýdi qamtamasyz etýi tıis», - degen Úkimet basshysy bul jumystardyń bárin baqylaýdy orynbasary Roman Sklıarǵa tapsyrdy.