Turǵyn úı satyp alý úshin kelestik 70 jas mamanǵa bıýdjettik nesıe berildi

TÚRKІSTAN. QazAqparat - Keles aýdanynda 70 mamanǵa turǵyn úı satyp alý úshin bıýdjetten nesıe berildi, dep habarlaıdy QazAqparat tilshisi.

Keles aýdanynda «Dıplommen aýylǵa» jobasy boıynsha bıyl 70 maman turǵyn úı satyp alý úshin bıýdjettik nesıe aldy. Sonymen qatar, atalǵan baǵdarlama aıasynda kóterme járdemaqy 59 azamatqa taǵaıyndalǵan.

«Aýyldyq aýmaqtardy damytý boıynsha jańa sharalar qabyldaý ári olardy úılestirý maqsatynda «Dıplommen aýylǵa» baǵdarlamasy aýdanymyzda keńinen júzege asyp jatyr. Bul baǵytta kóptegen jas mamandar baspanamen qamtylýda. Eldi-mekenge jumysqa ornalasqan maman bir rettik kóterme járdemaqy jáne qajettiligine qaraı turǵyn úı salý nemese satyp alý úshin 1500 aılyq eseptik kórsetkishten aspaıtyn somada bıýdjettik nesıe túrinde áleýmettik qoldaý sharalaryn alýǵa múmkindigi bar. Ol 0,01% jyldyq syıaqy mólsherimen 15 jylǵa deıingi merzimge beriledi, - dedi aýdandyq ekonomıka jáne qarjy bóliminiń basshysy Azamat Muratov.

Aıta keteıik, áleýmettik qoldaý sharalary usynylǵan maman aýyldyq eldimekende keminde úsh jyl jumys isteýge mindetteme alady.