Turǵyn úı sapasyn baqylaýdy kúsheıtý kerek – Májilis Tóraǵasy
ASTANA. QazAqparat - Búgin Májilistiń jalpy otyrysynda turǵyn úı qatynastaryna arnalǵan zań jobasyn talqylaý barysynda palata spıkeri Qabıbolla Jaqypov elimizde salynyp jatqan baspanalardyń, ǵımarattardyń qurylysyna qatysty syn aıtty.
«Bolat Bıdahmetuly, baspana máselese asa ótkir, osy problemaǵa óte-móte mańyz berýińizdi suraımyn», - dedi Palata Tóraǵasy Óńirlik damý mınıstrine qarata aıtqan sózinde.
«Ekinshiden, depýtattardyń basym bóligi kóterip otyrǵanyndaı, qazir elimizde salynyp jatqan baspana sapasy múldem syn kótermeıdi. Biz daýyl men jaýyn-shashyn bolsa sol úılerge údere nazar aýdaratyn boldyq, jel tursa bitti shatyrlar usha bastaıdy. Keıin sol shatyrlardyń ózin qaıta salýǵa mıllıondaǵan qarajat shyǵyndaımyz. Bul qalaı? Qarapaıym másele emes pe edi? Men qurylysshy retinde aıtaıyn, qazirgi sapa nólge teń. Buǵan deıin de túrli ǵımarattardy, baspanadan bastap zaýyttarǵa deıin salyp júrdik qoı. Degenmen, búgingideı bylyq bolǵan emes», dedi Q. Jaqypov.
Sonymen qatar, palata tóraǵasy mınıstrge qurylys salý barysynda onyń sapasyn birinshi orynǵa qoıýdyń qajettigin qatań eskertti.
